Gikalipay pag-ayo sa 431 nga mga kabataan ang ilang pagdawat sa Provincial Scholarship Certificate dungan sa pagpinirmahay sa Memorandum of Agreement (MOA) nga gipahitabo sa New Gym, Provincial Sports & Tourism Council, Mankilam, Tagum City, Oktubre 17, 2022.

Sila Provincial Administrator Engr. Josie Jean R. Rabanos isip representante ni Gobernador Edwin “Kuya Gov” I. Jubahib, Sangguniang Panlalawigan Committee on Education Chairman Shirley Belen R. Aala, PSP Focal Gloria Excelsa S. Pamugas duyog sa gatusan ka mga magtutungha ang mitambong sa pag-apod-apod sa sertipiko nga nag-ila sa mga benepisyaryo sa unom ka libo ka pesos (P6,000) tabang pinansyal sa matag semester sugod School Year 2023-2024 ubos sa Provincial Scholarship Program ni Kuya Gov.

Kahinumdoman dul-an kwatro mil ka mga kabataan ang mipailalom sa examination niadtong bulan sa Agosto tuig kasamtangan sa pagsungkit sa maong scholarship apan pipila lamang kanila ang nakapasar.

Si Rico Balcita estudyante sa Davao del Norte State College mapasalamaton sanglit siya mapalad nga naapil sa modawat sa nasangpit nga educational assistance sa probinsya.

“Salamat kang Kuya Gov nga nahatagan gyud mi og chances ug opportunity especially sa amoa nga matabangan ang amoang pamilya ug sa mga finances namo sa eskwelahan sa mga projects namo ug uban pa,” pasalamat ni Balcita.

Inspirasyon usab ang gitunol nga mensahe ni Jeanne Nicci C. Orcena, 4thyear student sa Tagum Doctors College, Inc alang ngadto sa mga estudyante sama kaniya.

“Through this scholarship and many others scholarships that you want in life in order to pursue it and just keep going ayaw ka wala og loob and keep on praying to God because you will get there someday,” sigon ni Orcena.

Writer: Lorna P. Tripoli