Malampuson ang gipahigayong 2ndregular meeting sa mga sakop sa Council of Human Resource Management Practitioner (CHRMP) – Davao del Norte, sa Bulwagan ng Karunungan, Government Center, Mankilam, Tagum City, niadtong Oktubre 14, 2022.

Sumala ni Leo A. Planas, ang Vice President sa CHRMP ug kasamtangang City Information Officer sa Island Garden City of Samal, nga gihimo ang maong panagtigum aron mahibal-an sa mga HR Practitioner ang mga katikaran kalabot sa bag-ong polisiya gikan sa Civil Service Commission. Kalakip sab ang paghisgut kabahin sa stress management nga labing gikinahanglan ning panahona gumikan sa nagkadaiyang mga hagit epekto sa pandemyang covid-19.

“Ang HR mao gyud nay kasagarang mo-absorb, maoy makapaminaw sa mga mulo ug yangungo sa mga empleyado. In most likelihood, ma-absorb na sa mga HR Practitioners. Kung ang HR Practitioner na mismo ang naay problema, stress na siya, unsaon pa niya paghatag og mga giya sa mga empleyado kung siya mismo dili na siya kahibalo mo-manage? So, mao na amo ning gigahin kining adlawa nga matagaan og inputs ang mga HR Practitioners kay pagbalik namo, kahibalo mi mo-manage ug kami mismo dili me ma-stress,” pagpasabot ni Planas.

Matud ni Dr. Rachelle Jan Lobino-Enojada, DPBP, FPPA, Licensed Psychiatrist, nga importanteng makat-onan sa mga HR Practitioner ang stress management gumikan kay ang ilang trabaho stressful kaayo. Aron sab malikayan sa mga practitioner ma-stress ug matun-an ang pagsulbad niini.

“So, importante kaayo para ma-overcome ang stress. Naa man nay mga stress management strategies na pwede matudlo. And at this point nga taas kaayo ang anxiety, taas ang kabalaka, one way is to retake it at a time. Being resilient as an individual, as a group, katong gitawag nga being mindful taking it one day at a time. Siguro importante kaayo nga i-strengthen ang atong support to each other, as a family, as a people in the government and as our co-worker, as well,” pagsaysay ni Enojada.

Atol sa maong kalihokan nipaambit si CSC Field Office Provincial Director Nelly L. Esperanza, CPA, MPA, sa mga bag-ong katikaran, mga polisiya nga kinahanglang i-implementar sa mga HR Practitioners.

“Mao pud ni ang time nga amo silang hatagan sa mga updates. Kung unsa tong mga importante nga memo circulars of the Civil Service Commission, that would improve their competencies as human resource management officers in their respective offices. Kay sa pagkasayod sa tanan natong empleyado sa lain-laing opisina o ahensya dinhi sa gobyerno, dinhi sa Davao del Norte, nga ang atong mga human resource management officer, sila gyud tong partner sa Civil Service Commission, para nga mapasegurado nga ang atoang mga polisiya ma-observe properly,” sumala sa Provincial Director.

Dugang ni Esperanza nga aktibo karon ang komisyon sa pagduso sa digitalization gumikan kay kini gihatagan og dakong gibug-aton ni Presidente Ferdinand Marcos, Jr. aron mopaspas ang serbisyo sa gobyerno ngadto sa katawhan ug malikayan ang korapsyon.

Writer: Nestor Mata, Jr.

 

 

DavNor News