Duha ka tulunghaan sa Lungsod sa Kapalong ang nahimong recipient sa Davnor Wash in School Celebration alang sa 2022 Global Handwashing Day, nga gipahigayon sa Department of Education – Davao del Norte Division sa pakig-alayon sa International Pharmaceutical Incorporated (IPI), niadtong Oktubre 21, 2022.

Ang mga tulunghaan gilangkoban sa Tiburcia Elementary School ug Gabuyan Central Elementary School, diin nakadawat og tag 600 ka buok sabon, nga gipang-apod apod sab sa ilang mga estudyante.

Gitudloan ang mga magtutungha sa saktong pamaagi sa paghugas sa ilang kaot gamit ang sabon sa nakataganang lugar nga hugasanan. Pinasahi ang gihimo sa mga estudyante sa Gabuyan Central Elementary School, diin gikanta nila ang Happy Birthday song samtang ilang gihugasan ang ilahang kamot.

Sumala ni Mercy Dela Cruz, Division Wash In School (WInS) Coordinator, nga ang 2022 Global Handwashing kabahin sa Oplan Kalusugan sa DepEd, diin usa sa unom ka component niini mao ang Wash In School Program, nga nakabase sa DepEd Order No. 10 series of 2016.

Nagpaabot sa iyang pasalamat sa IPI si Janice Fernandez, ang Public Schools District Supervisor, gumikan sa maong programa nga dako ang ikatabang sa mga kabataan alang sa pag-atiman sa ilang panlawas.

Nagpadayag sab sa ilang pasalamat ang mga principal sa duha ka tulunghaan nga sila si Bayani N. Escoton sa Tiburcia Elementary School ug si Justo A. Villaber, Pincipal sa Gabuyan Central Elementary School.

Nagpadangat sa iyang dakong pasalamat si Jason Delos Reyes, IPI Marketing Specialist sa Probinsyal nga Panggamhanan sa Davao del Norte nga gipangunahan ni Governor Edwin “Kuya Gov” Jubahib, gumikan sa makanunayong suporta, ilabi na sa mga programang makahatag kaayohan sa mga kabataan.

Ang Global Handwashing Day, usa ka tibuok kalibutan nga adbokasiya nga gipahinungod sa pagdugang sa kahibalo ug pagsabot bahin sa kamahinungdanon sa paghugas sa kamot gamit ang sabon isip usa ka epektibo ug barato nga paagi aron malikayan ang mga sakit ug makaluwas sa mga kinabuhi.

 

 

 

DavNor News