Human ang duha ka tuig nga gilimitihan ang paggawas-gawas sa mga senior citizens tungod sa pandemyang Covid-19, nakapasiugda na sab og panagtapok alang sa mga lolo ug lola sa Davao del Norte.

Sa panguna sa Provincial Social Welfare and Development Office (PSWDO), malipayong giselebrar sa mga Senior Citizens ang DavNor Elderly Week Culmination sa tumong nga palambuon ilahang mga talento ug panaghigalaay pinaagi sa pagpartisipar sa mga talent ug sports competition sama sa ballroom dancing, dancercise, song solo, chess, dama ug dart nga kabahin sab sa mga kalihokan sa maong tapok.

Matud pa ni PSWD Officer Rosalinda Rapista, ang selebrasyon maoy mahimong yawe sa pagpabalik ug paghashas sa mga abilidad sa mga senior citizens.

“Ibalik nato ang mga talento sa atong mga senior citizen wherein they will be competing through showcasing their talents on socio-cultural. Naa tay folk dance, naa pud sa pag-awit, also naa pud medical and health check-up in coordination with PHO and Doc Lacerona. This is the first time we will celebrate nga naa tay medical and dental services,” sulit ni PSWD Officer Rapista.

Adunay kapin kon kulang 550 ka mga partisipante gikan sa duha ka distrito sa Davao del Norte ang nitambong sa okasyon ug nakabenepisyo sa mga libreng medical ug dental services, libreng lugaw ug pagkaon, tambal ug mga cash prizes alang sa mga mananaog sa mga kompetisyon.

Dako ang pasalamat ni Rapista kay Gobernador Edwin “Kuya Gov” Jubahib sa pagpakita og makanunayong suporta ug dakong pagtagad sa mga programa alang sa mga Senior Citizens.

“Isa gyud kini nga programa nga gipakusgan ug suportahan ni Kuya Gov Edwin Jubahib para sa atong mga older persons. Tataw kaayo sa atong mga social services pinaagi sa PSWDO diin 100 percent ang support ni Kuya Gov nga nakita nato from health services naa diha ang mga tambal, check-up, pa lugaw, and tanang sports and socio-cultural activities. Gihatagan gyud og dakong pagtagad atong social services,” pagtapos ni Rapista.

Nahimong posible ang maong aktibidad pinaagi sa pakigtambayayong sa mga Local Government Units (LGUs), Probinsyal nga Panggamhanan ug Davao del Norte Federation of Senior Citizens Association.

Nitambong sa Davnor Elderly Week Culmination ang mga DavNor Municipal Social Welfare and Development Officers, si Archt. Leomel Puerto isip representante ni Kuya Gov ug ang Committee on Social Services sa panguna ni Board Member Flopone Royle Catalan.

Writer: Danica Delight Villanueva

 

 

 

 

 

DavNor News