Nibubo og tabang panginabuhian ang Child Fund Philippines ug Kaanib Foundation ngadto sa mga child labor parents’ association atol sa gilusad nga Community-Based Child Protection Referral Mechanism sa Provincial Training Hall, Mankilam, Tagum City Oktubre 26, 2022.

Ang mga beneficiaries mao ang taga-Barangay Alejal sakop sa Carmen alang sa ilang pork meat production, ang Magsaysay Bigasan Station, Barangay Magsaysay, Lungsod sa Carmen, taga-Barangay San Miguel sa Lungsod sa Sto.Tomas alang sa ilang frozen food products, ug Salvacion Bigasan Station sa lungsod sa Sto. Tomas.

Ang Child Fund Philippines usa ka Non-Government Organization (NGO) nga nakipagpartner sa nagkadaiyang ahensiya sa panggamhanan sama sa Department of Education, DOLE, PAGRO, DILG, PICKMO, PSWDO, kasundalohan ug mga kapulisan, ug mga LGU's alang sa hinabang ug proteksyon batok sa child labor.

Kapait ug kalisud sa pamilya ug labaw sa tanan ang kakulangon sa panginabuhian sa mga ginikanan ang mga nakitang rason sa nasangpit nga buhatan nganong ang mga kabataan niasdang na sa pagpanginabuhi diha sa kadalanan nga nagdala og peligro sa ilang mga kinabuhi.

Matud ni Dave Andrie Villegas, ang focal person sa DOLE XI nga nitabang ang DOLE sa mga ginikanan sa mga child laborers nga mamahimong benepisyaryo sa TUPAD Program sa gobyerno. Gipasalamatan sab ni Villegas si Gobernador Ediwn ‘Kuya Gov’ I. Jubahib sa makanunayong suporta niini sa kalihokan sa Child Fund Philippines.

Nakasentro ang tabang sa NGO alang sa giprayoridad nga upat ka barangay sa duha ka lungsod sa probinsya, ang Carmen ug Sto.Tomas.

Sa laing bahin, gibutyag sab sa maong grupo nga malampusong nakalikom na og pondong pinansyal ang 23 ka mga grupo sa Community Savings Group Foundation sa Davao del Norte nga nagtanyag og loan services ug mutual fund alang sa mga miyembro niini ilabi na ang ginikanan sa mga child laborer.

Sa maong okasyon, giila sab sa naasoyng NGO ang suporta sa mga government agencies ug tagsa-tagsa ka mga focal persons ug mga department heads pinaagi sa pagtunol og sertipiko sa aktibong partisipasyon niini sa kawsa batok child labor.

Writer/Photographer: Lorna P. Tripoli

 

 

DavNor News