Tungud sa dakong gugma ni Governor Edwin “Kuya Gov” Jubahib sa mga tribo, dili niya kaya magsud-ong sa ilang kalisod karon, labi na tungod sa nahitabong pag-undang sa palit sa ilang produkto nga Daratex abaca.

Mao nga gibalik-balikan dayon ni Kuya Gov sa pagsaka ang mga lagyong sitio sa lungsod sa Talaingod aron sa pagtunol sa hinanaling hinabang sa liboan ka pamilyang tribo nga nawad-an og panginabuhian ug wala nay makaon.

“Dili nako gusto nga ang kaigsoonang tribo maglisod sa pagkaon. Dili ko gusto nga ang inyong mga anak ug kamo mismo dili makakaon sulod sa usa ka adlaw. Ingon ana ang akong paghigugma kaninyo,” paniguro sa gobernador sa mga IPs.

Human mihatag sa hinabang sa liboan ka mga IPs sa Sitio Nasilaban kagahapong adlawa, mibalik na pud og saka si Kuya Gov sa Talaingod ganinang buntag aron sa pagtunol og hinabang sa liboan ka mga IPs didto sa layo gihapon nga Sitio Paiton sa Barangay Dagohoy.

Mihatag si Kuya Gov sa dul-an 1,000 ka food packs, 1,000 ka semilya sa Tanggongon Abaca, 1,000 ka semilya sa cardava, 500 ka semilya sa kape ug mga semilya sa mais ug gulay sa Paiton.

Ipadayon sa gobernador ang personal nga pagpanghatag sa mga hinabang sa mga tribo ugma ug sa sunod pa nga mga adlaw.

Kahinumduman nga naapektuhan ang mga tribo sa gihimong pag-undang sa pagpalit sa mga buyer sa daan ug menos nga variety sa abaca nga Daratex, tungod kay dili na kini mahalin sa Japan ug uban pang mga nasud.

Isip maluntarong solusyon, mihanyag ang gobernador nga mag-apod-apod og 500,000 ka mga semilya sa labaw nga variety sa Tangogon abaca sa tanang mga sitio sa Talaingod, aron maoy ilang itanum.

Samtang maghulat usa ma-harvest ang maong abaca, i-pukos ni Kuya Gov ang iyang programa nga DavNor KAAGAPAY sa mga tribo, aron magtanum sila sa mais, gulayon ug uban pang high-value crops, apil na ang pagbuhi sa mga manok ug uban pang hayop.

“Dili ko gusto nga ang pamilyang tribo padayon nga mag-antus sa kalisod… Ang gihunahuna nako nga mahaw-as mo sa inyong kalisdanan ug moasenso mo…,” ingon ni Kuya Gov.

Gisugo sab sa gobernador ang iyang mga sakop aron butangan og liboan ka mga semilya sa tilapia ug buhatan og fish cage ug floating cottage ang Lake Paiton, alang sa dugang nga panginabuhian sa mga tribo.

Kauban ni Kuya Gov nga mitunol sa hinabang sila Mayor Jonie Libayao, 56th IB Operations Officer Captain Kenneth Yma, Provincial Social Welfare and Development Officer Rose Rapista ug Provincial Agriculturist Jose Andamon.

 

 

 

 

 

DavNor News