Gikalipay pag-ayo ni Governor Edwin "Kuya Gov" nga nahimong sumbanan sa Risk Resiliency Program - Climate Change Adaptation and Mitigation (RRP-CCAM) ang probinsiya sa Davao del Norte.
Giabi-abi ni Kuya Gov ang 50 ka mga focal persons sa RRP-CCAM ug DRMD division heads sa Department of Social Welfare and Development (DSWD) gikan sa nagkalainlaing rehiyon sa nasud, nga nagtan-aw-tuon sa iyang programa labot sa kinaiyahan ug disaster management ug CCA.
Nahimong modelo ang Davao del Norte gumikan kay kini ang usa sa pinaka-unang probinsiya sa tibuok Pilipinas nga naka-implementar sa P50.1 million nga pondo gikan DSWD alang sa RRP-CCAM Cash-for-Work program sa probinsiya karong tuiga.
Gidayeg ni Hiasma Gani, ang focal person sa DSWD Central Office si Kuya Gov sa maayong koordinasyon sa mga concerned offices sa Kapitolyo aron abtik ug sayo nga mapatuman ang RRP-CCAM program niini.
Miadto ang mga bisita sa Sitio Cabidianan, Talaingod, Davao del Norte aron mutan-aw sa proyekto sa flagship DavNor KAAGAPAY program, nga mipatuman sa Cash-for-Work sa komunidad sa mga tribo.
Nalingaw pag-ayo ang mga bisita sa gihanyag ni Kuya Gov kanila nga durian 'eat all you can' sa Tagum night market.
Ang ilang benchmarking sa probinsiya parte sa ilang lima ka adlaw nga RRP-CCAM Conference sa Davao City.
Kahinumduman nga nasakmit sab sa Davao del Norte ang pinakataas nga “Beyond Compliant” award sa 22nd Gawad Kalasag Seal for Excellence in Disaster Risk Reduction and Management (DRRM) and Humanitarian Assistance for the Local DRRM Councils and Offices.
