Gipangunahan ni Governor Edwin "Kuya Gov" Jubahib ang pagsunog sa mga droga ug drug paraphernalia nga mobalor sa P8.1 million ganinang buntag didto sa Wood Haven Crematorium, La Filipina, Tagum City.

Kini milangkob sa 514.0331 gramo nga shabu ug 7.637 kilos nga marijuana, nga gikan sa 235 ka mga kaso sa paglapas sa R.A. 9165 o Dangerous Drug Act of 2002 nga nasikop sa nagkalain-laing mga law enforcement agencies sa tibuok Davao Region sa panguna sa Philippine Drug Enforcement Agency (PDEA).

Kauban ni Kuya Gov sila PDEA-XI Director Aileen Lovitos, PNP-XI Deputy Regional Director for Operations PCol. Thor Valiente Cuyos, Davao del Norte Police Provincial Office Chief PCol. Antonio Alberio, Jr., PAO-Davao del Norte Chief Atty. Janess Blanco-Manipes, City Prosecutor Virginio Juan II, ug Wood Haven owner Aljo Cris Dizon.

Samtang iyang gipasalig ang hingpit nga suporta sa probinsya sa way puas nga kampanya sa gobyerno batok ginadili nga droga, nanawagan si Kuya Gov sa mga drug users nga moundang na sa ilang bisyo, sanglit ginadaut nila ang ilang kaugalingon ug kaugmaon. Iyang gihanyag kanila ang libre nga pagpa-rehab sa Luntiang Paraiso Regional Rehabilitation Center (LPRRC) ug sa Bahay Silangan Drug Reformation Center.

Sa iyang tinguha nga mahimong “drug-free” ang Davao del Norte, mihanyag sab si Kuya Gov nga mohatag siya’g ganti sa mga makatudlo sa mga drug lords ug drug pushers, diin ang pinakadako nga iyang ihatag moabot sa P1 million alang sa makatudlo sa pinaka-big time nga drug lord sa probinsya.

Gipasigarbo sab niya ang nakab-ot sa mga lungsod sa Talaingod ug San Isidro, nga gideklarang "Drug-Free Municipalities" bag-ohay pa lamang.

 

 

 

DavNor News