Pagpakabana ug pagpakisayod sa obligasyon sa mga kabtangan alang sa kalamboan sa Davao del Norte, kini ang tema sa gipahigayong Information Education Campaign kalabot sa Real Property Tax Assessment sa tanang mga real properties sa probinsya uban sa koordinasyon sa North Davao Assessors League, INC (NDALI).

Gipasabot ni Provincial Assessor Engr. Lily M. Salazar nga ilang gilambigit ang mga opisyales sa barangay sanglit sila ang labing unang nasayod sa mga kalihokan ug sa mga kabtangan sa mga lumolopyo sa ilang ginsakopang lugar nga angayang pahamtangan og mehoras.

Dugang ni Salazar nga sakto lang ug makatarunganong buhisan ang ipahamtang kanila dungan sa pagkanayon nga importanteng motaho gilayon ang mga opisyal sa barangay ngadto sa mga Municipal Assessors Office sa matag LGU aron mabisitahan sa mga assessors ug ma-assist ang hintungdan sa propiyedad.

Nag-awhag sab si Gobernador Edwin “Kuya Gov” I. Jubahib, pinaagi sa iyang representante, sa matag Municipal Treasurer’s Office nga maghimo’g mga basihan o sistema aron dili maglisud ug malangan ang mga tax payers sa ilang pagbayad.

“𝘎𝘶𝘴𝘵𝘰 𝘯𝘪 𝘒𝘶𝘺𝘢 𝘎𝘰𝘷 𝘯𝘨𝘢 𝘥𝘪𝘭𝘪 𝘮𝘢𝘭𝘢𝘯𝘨𝘢𝘯 𝘢𝘯𝘨 𝘴𝘪𝘴𝘵𝘦𝘮𝘢 𝘯𝘨𝘢 𝘮𝘢𝘥𝘶𝘨𝘢𝘺 𝘱𝘢𝘨𝘣𝘢𝘺𝘢𝘥 𝘢𝘯𝘨 𝘢𝘵𝘰𝘯𝘨 𝘮𝘨𝘢 𝘬𝘢𝘵𝘢𝘸𝘩𝘢𝘯. 𝘔𝘢𝘨𝘭𝘪𝘴𝘶𝘥 𝘴𝘪𝘭𝘢. 𝘗𝘢𝘳𝘢 𝘮𝘢𝘭𝘪𝘬𝘢𝘺𝘢𝘯 𝘱𝘶𝘥 𝘢𝘯𝘨 𝘨𝘳𝘢𝘧𝘵 𝘢𝘯𝘥 𝘤𝘰𝘳𝘳𝘶𝘱𝘵𝘪𝘰𝘯, 𝘮𝘢𝘭𝘪𝘬𝘢𝘺𝘢𝘯 𝘱𝘶𝘥 𝘢𝘯𝘨 𝘱𝘢𝘨𝘬𝘢𝘭𝘢𝘯𝘨𝘢𝘯 𝘴𝘢 𝘪𝘭𝘢𝘯𝘨 𝘱𝘢𝘯𝘢𝘩𝘰𝘯 𝘶𝘨 𝘰𝘳𝘢𝘴,” pagpadangat ni Wowie de Ramos, PGO Executive Assistant, sa mensahe sa gobernador.

Sa pikas bahin, atol sa maong kalihokan, gianunsyo ni Provincial Director Registrar of Deeds Atty. John Paul O. Devilleres nga posibleng sa paghinapos sa tuig 2022 o kaha sa mosuloday nga tuig 2023 ipahigayon ang usa ka massive Handog Titulo Program alang sa taga-Davao del Norte.

Kini agi’g pagtamod sa hangyo sa gobernador nga iapod-apod na ang mga titulo sa yuta. Ubos sa maong programa, ma- “avail” ang pag-release sa orihinal nga titulo bisan og tax declaration lang ug walay bayarang tax clearances.

“𝘎𝘪𝘱𝘢𝘵𝘢𝘸𝘢𝘨 𝘬𝘰 𝘯𝘪 𝘎𝘰𝘷𝘦𝘳𝘯𝘰𝘳 𝘭𝘢𝘴𝘵 𝘸𝘦𝘦𝘬. 𝘐𝘯𝘨𝘰𝘯 𝘴𝘪𝘺𝘢, '𝘈𝘵𝘵𝘺., 𝘶𝘯𝘴𝘢 𝘱𝘢 𝘬𝘢𝘥𝘢𝘨𝘩𝘢𝘯 𝘢𝘯𝘨 𝘵𝘪𝘵𝘶𝘭𝘰 𝘴𝘢 𝘪𝘯𝘺𝘰𝘩𝘢?' '𝘋𝘢𝘨𝘩𝘢𝘯 𝘱𝘢.' '𝘕𝘨𝘢𝘯𝘰𝘯𝘨 𝘸𝘢𝘭𝘢 𝘱𝘢 𝘮𝘢𝘯 𝘯𝘢 𝘯𝘢𝘩𝘢𝘵𝘢𝘨? 𝘚𝘪𝘨𝘶𝘳𝘰 𝘸𝘢𝘭𝘢 𝘬𝘢𝘣𝘢𝘺𝘢𝘥 𝘴𝘢 𝘮𝘶𝘯𝘪𝘴𝘪𝘱𝘺𝘰? 𝘋𝘪 𝘨𝘺𝘶𝘥 𝘯𝘢 𝘮𝘢-𝘳𝘦𝘭𝘦𝘢𝘴𝘦.' 𝘚𝘰, 𝘪𝘯𝘨𝘰𝘯 𝘴𝘪𝘺𝘢 𝘱𝘸𝘦𝘥𝘦 𝘣𝘢 𝘯𝘢 𝘮𝘢-𝘳𝘦𝘭𝘦𝘢𝘴𝘦 𝘯𝘢 𝘱𝘢𝘳𝘢 𝘭𝘢𝘯𝘨 𝘮𝘢-𝘢𝘱𝘰𝘥 𝘢𝘱𝘰𝘥 𝘴𝘢 𝘮𝘨𝘢 𝘵𝘢𝘰? 𝘗𝘸𝘦𝘥𝘦 𝘨𝘶𝘥 𝘯𝘢 𝘨𝘶𝘥,” pagsubay ni Devilleres.

Giduso sab niini ang kamahinungdanon sa pagtumbok sa orihinal nga titulo gikan sa peke.

Sa laing bahin, nagpaabot sa iyang pasalamat si Salazar sa gobernador nga natigayon ang IEC nga gitambongan sa mga barangay officials, functionaries, City ug Municipal Assessors Offices. Kini gihimo sa Heroben Hometel, Osmeña Extension, Barangay Magugpo West, Tagum City niadtong Nobyembre 23, 2022.

“𝘛𝘩𝘢𝘯𝘬𝘴 𝘵𝘰 𝘴𝘱𝘦𝘤𝘪𝘢𝘭𝘭𝘺 𝘵𝘰 𝘰𝘶𝘳 𝘏𝘰𝘯𝘰𝘳𝘢𝘣𝘭𝘦 𝘨𝘰𝘷𝘦𝘳𝘯𝘰𝘳 𝘧𝘰𝘳 𝘨𝘪𝘷𝘪𝘯𝘨 𝘶𝘴 𝘵𝘩𝘦 𝘰𝘱𝘱𝘰𝘳𝘵𝘶𝘯𝘪𝘵𝘺 𝘯𝘨𝘢 𝘮𝘢𝘨-𝘤𝘰𝘯𝘥𝘶𝘤𝘵 𝘬𝘢𝘮𝘪 𝘯𝘨 𝘐𝘌𝘊 𝘐𝘯𝘧𝘰𝘳𝘮𝘢𝘵𝘪𝘰𝘯 𝘌𝘥𝘶𝘤𝘢𝘵𝘪𝘰𝘯 𝘊𝘢𝘮𝘱𝘢𝘪𝘨𝘯. 𝘛𝘩𝘪𝘴 𝘪𝘴 𝘧𝘰𝘳 𝘵𝘩𝘦 𝘣𝘢𝘳𝘢𝘯𝘨𝘢𝘺 𝘰𝘧𝘧𝘪𝘤𝘪𝘢𝘭𝘴 𝘰𝘧 𝘋𝘢𝘷𝘢𝘰 𝘥𝘦𝘭 𝘕𝘰𝘳𝘵𝘦 𝘯𝘨𝘢 𝘥𝘪𝘪𝘯 𝘯𝘢𝘱𝘢𝘩𝘪𝘨𝘢𝘺𝘰𝘯 𝘯𝘪 𝘴𝘪𝘺𝘢 𝘬𝘢𝘳𝘰𝘯𝘨 𝘵𝘶𝘪𝘨𝘢 𝘯𝘨𝘢 𝘩𝘢𝘱𝘪𝘵 𝘯𝘢 𝘨𝘺𝘶𝘥 𝘮𝘢𝘩𝘶𝘮𝘢𝘯 𝘢𝘯𝘨 𝘵𝘶𝘪𝘨 2022. 𝘉𝘶𝘵 𝘵𝘩𝘦𝘯, 𝘵𝘩𝘦 𝘨𝘰𝘷𝘦𝘳𝘯𝘰𝘳 𝘨𝘢𝘷𝘦 𝘵𝘩𝘪𝘴 𝘰𝘱𝘱𝘰𝘳𝘵𝘶𝘯𝘪𝘵𝘺 𝘯𝘨𝘢 𝘮𝘢𝘱𝘢𝘩𝘪𝘨𝘢𝘺𝘰𝘯 𝘯𝘪 𝘴𝘪𝘺𝘢. 𝘗𝘢𝘳𝘢 𝘯𝘪 𝘴𝘢 𝘬𝘢𝘢𝘭𝘢𝘮𝘢𝘯 𝘶𝘨 𝘬𝘢𝘭𝘢𝘮𝘣𝘰𝘢𝘯 𝘴𝘢 𝘱𝘳𝘰𝘣𝘪𝘯𝘴𝘺𝘢 𝘴𝘢 𝘋𝘢𝘷𝘢𝘰 𝘥𝘦𝘭 𝘕𝘰𝘳𝘵𝘦,” butyag ni Salazar.

Writer: Lorna P. Tripoli

 

 

DavNor News