Giaprobahan sa Provincial Peace and Order Council (PPOC) ang P1.77-billion Peace and Order and Public Safety (POPS) Plan sa Probinsiya sa Davao del Norte alang sa tuig 2023-2025.

Sa PPOC Meeting kagahapon nga gipangulohan ni Governor Edwin “Kuya Gov” Jubahib, gi-uyonan sa mga miyembro sa Council ang budget nga P1.3 billion alang sa Peace and Order Program ug pondo nga P451 million alang sa Public Safety Program, sulod sa tulo ka tuig sugod 2023.

Ang pondo nga P1.11 billion magagikan sa local nga pondo sa Probinsiyal nga Panggamhanan sa Davao del Norte, samtang ang P661.77 million gikan sa ubang mga tinubdan, sama sa nasyonal nga panggamhanan ug official development assistance (ODA).

Ang mga POPS programs ang projects alang tuig 2023 gigahinan og P709.4 million.

Pinakadakong gigahinan sa 3-year POPS Plan ang Serbisyo Caravan sa mga lagyo ug hilit nga lugar sa kantidad nga P523.2 million; sunod ang pag-abli ug pagmintinar sa mga kalsada nga mokabat ngadto sa kapin P144 million; ug ang DavNor KAAGAPAY program nga mobalor P116.4 million.

Ang POPS Plan maoy tulo ka tuig nga komprehensibong plano alang sa mga programa, proyekto ug mga kalihokan nga nagtumong sa pagkab-ot sa luwas, hapsay, malinawon ug progresibo nga komunidad.

Kini sab ang rekisitos nga kinahanglanon aron maaprobahan ang alokasyon alang sa Confidential Fund (CF) sa local chief executive, nga ipailawom sa review sa Department of Interior and Local Government (DILG) ug endorsement ngadto sa Department of Budget and Management (DBM).

Ipasa dayon sa PPOC ang resolution sa POPS Plan ngadto sa Sangguniang Panlalawigan (SP) aron maaprobahan kini sa Junta Probinsiyal ug aron masiguro nga matagaan jud kini og igong pondo.

Kahinumduman nga gibasura sa SP ang proposed budget alang sa CF ni Kuya Gov, tungod kuno kay wala pay napasa nga POPS plan ang executive department.

Pero, base sa guidelines nga gipagula sa DILG, ang pagpasa sa POPS Plan sulod sa 200 ka adlaw gikan paglingkod sa mayor o gobernador human ang eleksyon, o hangtud sa Enero 15.

Sulti ni Kuya Gov nga gawas sa paggamit sa iyang CF alang “confidential expenses” aron sa “surveillance activities” sa pagsuporta sa iyang operations ug pagtuman sa iyang mandato isip gobernador, iya sab ginagamit kini kung dunay mga emergencies nga nagkinahanglan og hinanaling tabang.

Dugang niya nga bisan nadeklara na ang probinsiya isip “Insurgency-Free Province”, kinahanglan gihapon nga pakusgan ang programa sa peace and order ug ug public safety aron molungtad ang kalinaw ug kahapsay ug masiguro nga dili na mobalik pagsamok ang mga rebeldeng NPA sa probinsiya.

Writer: Noel P. Baguio

 

 

 

DavNor News