One town, one product.

Kini ang gipalanog nga mensahe ni Gobernador Edwin “Kuya Gov” I. Jubahib atol sa Rural Improvement Club (RIC) Achievement Day nga nagbitbit sa temang “Better Home & Community Life through Women’s Participation” sa DavNor Gym, DNSTC, Mankilam, Tagum City, niadtong Nobyembre 28, 2022.

Tingoha sa gobernador nga magahinan og igong pondo ang mga panginabuhian sa matag pundok sa tuig 2023 labi na gyud ang sektor sa mga kababayen-an isip kabahin sa mga nag-unang programa sa gobernador nga matabangan moasenso ang panginabuhi sa matag pamilya.

Giagni ni Kuya Gov ang dul-an lima ka libo ka mga RIC members sa tibuok probinsya nga mokoordinar sa ilang LGU o sa ilang mayor alang sa tabang pinansyal sa ilang mga proposed project sama sa food processing, fish farming, dressmaking ug gulayan sugod sunod tuig.

Hangyo ni Kuya Gov nga usa lamang ka produkto sa usa ka lugar ilang himoon aron malikayan ang kompetensya ug dali rang mahalin ang ilang mga baligya. Gihatagan og importansya sa gobernador ang ilang mga kakugi labi na nga dako og ikatabang ang ilang income sa ilang pamilya labi na karon nga bag-ohay pa lang nasinati ang kalibutanong pandemya.

“Aduna kita karoy budget nga gi-prepare for 2023 nga atong iapod-apod o suporta alang sa mga RIC Members,” matud sa gobernador.

Ang RIC namugna niadtong tuig 1981 ug hangtod karon padayon nga nahimong dangpanan sa mga panginabuhian sa mga kababayen-an ubos sa pagdumala ni RIC Provincial Coordinator Eva Estabillo uban sa pakig-alayon sa Provincial Agriculturist’s Office. Siya usab nagpasalamat kang Tagum Vice Mayor Allan Lopez Rellon ug kang Kuya Gov. Jubahib sa mainiton nilang suporta.

“Para ipakita, i-showcase namo, livelihood man gud ni. Gitagaan tanang mga women og livelihood. So, i-showcase namo karon ipakita sa katawhan kung unsa ang ilang mga nahimo, maong makita diri ang mga nagkalain-laing lamisa sa kada LGU,” pagsubay ni Estabillo.

Sa susamang okasyon, gipasidunggan ang mga RIC President ug uban pang indibidwal nga adunay dakong kahimoan sa maong kalampusan. Gitunol kanila ang mga sertipiko nga gilagdaan ni Kuya Gov Edwin Jubahib. Samtang sa gardening contest, ang mga mosunod nga RIC LGU maoy palarang nidaug.

Champion – RIC Tagum, cash prize nga P35,000

2NDPlace – RIC Panabo, cash prize nga P25,000

3RDPlace – RIC Kapalong, cash prize nga P20,000

4THPlace – RIC Carmen, cash prize nga P15,000

Ang Table/ Product Display naangkon sa RIC Panabo samtang nahimong Ginang RIC 2022 ang taga-Siyudad sa Tagum.

Napuno ang DavNor gym niadtong tungora sa mga produktong ginama sa mga RIC members sa Davo del Norte.

Writer/Photo: Lorna P. Tripoli

 

 

 

DavNor News