Adunay 56 ka mga residente sa Luntiang Paraiso Regional Rehabilitation Center (LPRRC) nga padayong mipailalom sa pagparehab sa ilang kaugalingon gikan sa paggamit sa ilegal nga droga. Kini ang gikompirma ni Provincial Economic Enterprise Development Office (PEEDO) OIC Sergio G. Bandos. Singkwenta (50) niini mga kalalakin-an ug unom (6) ka mga kababayen-an ubos sa pagdumala sa PEEDO. 

Sa 22nd founding anniversary nga gihimo sa Luntian Gym, New Corella, niadtong Disyembre 22, gi-awhag ni Mayor Jorjan Federiso ang mga residente sa pasilidad nga sa higayong makaguwa na sila sa maong dapit, dili na nila kini balikan pa ug hingpit nang makalingkawas gikan sa paggamit sa ginadili nga droga.

Gihatagan usab niya og importansya ang mga nagdumala sa Luntiang Paraiso sama sa mga empleyado sa PEEDO.

“Ma-compare daw nila ang serbisyo, kini dili tungod namo nga mga opisyales, kondili tungod na ninyong tanan nga mga empleyado diri. Congratulations,” matud sa mayor.

Samtang, usa ka inilang personalidad sa Davao de Oro nga kanhi Sangguniang Bayan Member nga karon gawasnon na sa rehabilitasyon ang mipaambit usab sa makapatandog nga mensahe ngadto sa mga residente nga naghatag og inspirasyon sa pagbangon uban sa pagbag-o sa kinabuhi.

“Bisan unsaon gyud naa mana si Dra. Genojada siya nag-check-up sa akoa, maong kamo ate ug kuya pagbinuotan mo diri kay kung dili mo magbinuotan, dili gyud mo kagawas,” padasig sa kanhi residente.

Gipaniguro usab ni Dr. Kristine Nicole P. Hortel, Acting Chief sa LPRRC Infirmary Hospital nga tanang mga residente sa rehabilitasyon ila gyud giatiman ang panglawas.

“In relation of drugs sa alcohol, naay ginabati nga withdrawal syndrome which is crucial nga kailangan bantayonon. Naa mi amoang infirmary area didto nga naay three rooms nga didto sila ginamonitor sa atong tulo ka mga nurses nga available 24/7,” ingon ni Hortel.

Samtang atol sa maong kalihokan nagpasalamat si PEEDO OIC Bardos kang Kuya Gov Edwin I. Jubahib sa maluntarong suporta niini kinsa maoy chairman sa Provincial Anti-Drug Abuse Council.

Atol sa okasyon giila ug gipasidunggan pinaagi sa paghatag og sertipiko sa ilang dedikasyon ug pagserbisyo ang mga social workers. Kalakip niini ang Tagum City Social Welfare & Development Office, mga PEEDO Staff, LPRRC staff, stakeholders ug uban pang indibidwal nga nahimong kabahin sa kalampusan nga naangkon gikan sa kamugnaan niini sulod sa kapin duha ka dekadang katuigan nga gilatas sa Luntiang Paraiso.

Writer/Photo: Lorna P. Tripoli

 

 

 

DavNor News