Gidagsa sa mga nagkadaiyang pribadong kompanya ingo’g makusganon nilang suporta sa mga inisyatibo ni Kuya Gov Edwin I. Jubahib nga mao ang pagtubag sa kakulangon sa trabaho sa mga Dabaonon. Kini pinaagi sa pag-abli sa bulawanong oportunidad nga mitanyag og mga bakanteng trabaho ubos sa programang Job and Training Fair niadtong Disyembre 7, 2022 nga nagbitbit sa temang: “Edukasyon, Trabaho, Negosyo at Kabuhayan (E-TNK) alang sa Dabaonon” dinhi sa Davnor gym, DNSTC, Mankilam, Tagum City.

Gidugok usab kini sa mga kabatan-onan ug mga job hunters alang sa lokal nga trabaho ug employment abroad. Kini nahimo gumikan sa pakig-alayon sa mga stakeholders ug sa Department of Labor and Employment, Department of Trade and Industry, Provincial Employment Service Office – Employment and Workforce Development Division (PESO-EWDD) ug TESDA alang sa livehood training sa mga wala palaring aplikante.

Samtang nagpahigayon usab og Pre-registration alang sa Provincial Scholarship Program ug Special Program for Employment of Students.

Sa hamubong programa gipahayag ni Wowie de Ramos, Executive Assistant ug representante ni Kuya Gov nga paningkamotan sa gobernador nga masulbad ug matubag ang unemployment problem sa mga katawhan nga atol sa pandemya miuswag ang ihap sa mga nawad-an og trabaho.

“Busa atong paningkamotan nga karong tuiga ug sa mosunod pang tuig masulbad na nato ang problema sa ka walay trabaho sa atong probinsya ug mahatagan og trabaho ang kinatibuk-ang trabahante sa Davao del Norte,” paghatud ni de Ramos sa mensahe sa gobernador.

Ang mga stakeholders ug mga government partners gihatagan og sertipiko nga gilagdaan sa gobernador agi’g pag-ila sa ilang kontribusyon ug suporta sa employment program probinsya.

Writer/Photo: Lorna P. Tripoli