238 ka mga San Isidrohanon nga miyembro sa Pantawid Pamilyang Pilipino Program o 4P's ang migradwar na sa programa atol sa gipahigayong 2022 Graduation and Exit Ceremony sa KALAHI Multi-Purpose Gym, Igangon, San Isidro, Davao del Norte, niadtong Disyembre 13, 2022.

Malipayong gidawat sa mga benepisyaryo ang ilang diploma, pamatuod nga sila malampusong nihuman sa maong programa ug natagamtaman ang mas maayong kahimtang sa pamuyo tandi sa kalisod nga ilang naandan sa milabayng mga katuigan.

Sumala ni Margie G. Cabido, ang 4P’s Division Chief sa Department of Social Welfare and Development (DSWD) sa Rehiyon XI, nga ilaha nang gibuhian ang maong mga benepisyaryo sanglit natangtang na kini sa listahan isip pobre sa pinakapobre o di ba kaha nigradwar na sa pagtuon ang ilahang mga anak. Dugang pa niya, nga sa umalabot nga mga katuigan pito (7) na lamang ka tuig ang pinakadugay nga mamahimong benepisyaryo sa 4P’s. Nagpaabot sab kini sa iyang dakong pasalamat kang Governor Edwin “Kuya Gov” Jubahib gumikan sa makanunayong suporta sa ilahang mga programa.

“So, ang basihan lang na mo-graduate sila. First, is kung validated na sila as none poor sa atong listahan, so meaning dili na sila pobre sumala pa sa atong ginabasehan nga datus. Ang national household targeting system nga kana scientific base gyud ang gibasehan ana. Ikaduha, kung wala na siya’y anak nga 0 to 18 years old nga nagaeskwela pwede na siya mo exit sa program ug iyaha nang na-max out ang iyang three children limit kasi ang program tulo (3) lang gyud ka bata ang atong i-qualify per household. To our Governor Edwin Jubahib, Gov, dako kaayo ang among pasalamat in behalf sa Department of Social Welfare and Development. Ang suporta gyud sa probinsya sa Davao del Norte, hugot gyud ug makita, mabati gyud na namo nga lahi ra gyud ang suporta nga gikan sa local government of the Province of Davao del Norte,” pagsaysay ni Cabido.

Subay sa maong graduation ceremony, giturn-over sa DSWD ang folder sa mga benepisyaryo sa 4P’s lulan ang ilahang mga record ngadto sa Local Government Unit (LGU) San Isidro aron sila na ang magmonitor ug mohatag sa mga interbensyon kalakip sab ang pagtubag sa ilang mga panginahanglanon.

Nagpadangat sa iyang pahalipay ug dakong suporta sa mga benepisyaryo ang amahan sa lungsod Mayor Silvano B. Gaje. Nanaad kini nga dili niya pasagdan ang mga benepisyaryo nga giturn-over na sa DSWD kaniya. Dugang ni Silvano nga andam siya motabang sa mga anak sa mga benepisyaryo nga midgradwar na sa ilang pagtuon pinaagi sa paghatag og trabaho.

“So, atong i-congrats ang tanang naka-graduate. Ang tinuod lang bisan unsa kalisud ang atong pagpuyo ang atoang pagpaningkamot maoy makapabarog sa atoang kaugalingon. Maningkamot ta. Dawaton nako na mam, kung unsay matabang sa atoang munisipyo himuon pud nato. Kay dili pwede nga atong pasagdan kay mao ni ang atong gisaad sukad pa sauna. Ako motabang lang ko kutob sa akong mahimo,” sulti sa mayor.

Duha ka benepisyaryo ang nipaambit sa ilahang kasinatian samtang sila natabangan sa maong programa.

“Isip 4P’s, una ang among pamuyo talagsa ra mi makapalit og litson manok, karneng baboy ug baka. During payout makapalit na dyud mi. Dili lang pud kanunay, So, at least makatilaw na ta. Diha sa pag-eskwela sa bata, inig payout, ato dayong saaran ang atong mga kabataan nga sige lang nak, inig abot sa payout palit ta og t-shirt, palit tag sapatos, pero atong hunahunaon nga ang first quarter atong igahin alang sa eskwelahan aron makabayad na ta,” pagbutyag ni Elizabeth T. Diapolet, taga-Brgy. Libuton.

“Sa una, usa ako ka yanong lumolupyo sa Kipalili. Then, pag-abot sa Pantawid nahimo akong aktibo tungod kay napili ako isip usa ka parent leader. Ug kini akong gibuhat aron mahimo akong usa ka empowered woman. Sa tinuod lang, sukad nahimo akong 4P’s, ang akong mga anak gi-encourage nako nga mo-involve sa mga sports activity. Proud ko moingon nga ang akong duha ka mga anak nahimong DAVRAA player gikan elementary hangtud sila nahimong high school,” pahayag sa kalipay ni Liezl P. Tolento, lumolupyo sa Brgy. Kipalili.

Atol sa maong kalihokan, nipadangat si 1st District Congressman Pantaleon D. Alvarez sa iyang mensahe pinaagi sa iyang Executive Assistant Audrey Perez. Iyang gidayeg ang programa sa 4P's nga dako gayud ang tabang sa mga katawhan. Kalakip niini mihatag si Alvarez og tag-5 kilo nga bugas ug t-shirt alang sa tanang migradwar isip pahalipay.

Writer/Photo: Nestor Mata, Jr.

 

 

 

DavNor News