Gipangunahan ni Governor Edwin "Kuya Gov" Jubahib ang pagpanumpa sa mga bag-ong napiling opisyales, board of directors sa Davao del Norte Credit Surety Fund Cooperative (DNCSFC), sa VIP Clubhouse, DNSTC, Mankilam, Tagum City, niadtong Disyembre 12, 2022.

Sumala sa Chairperson nga si Edelmira M. Recto, nga gimugna ang maong kooperatiba aron makahatag og mas daghang serbisyo sa mga katawhan sa DavNor labi na sa mga nagkinahanglan og salapi sa labing sayon nga pamaagi.

“Actually, namugna ni siya, initiative of the province, so naay counterpart si province. So, ang main purpose is to help the primary cooperatives, in terms of financial resources and marketing of product. That’s why we have this DNCSFC. I’m very thankful to the honorable Governor Edwin Jubahib. Right now, nag-commit siya nga he will really support the cooperatives. Tabangan niya tanan,” sigon ni Recto.

Nagpadayag ang gobernador sa iyang dakong suporta sa mga kooperatiba, sanglit dako kining ikatabang sa mga Dabaonon labi na sa dali nga pagpahulam og kwarta. Nanaad kini nga tabangan ang mga kooperatiba sa natad sa pagpamaligya sa ilang mga produkto aron mas molambo pa ang ilahang pundok.

“Karon, lahi ang atong himuon holistic approach. Kinahanglan nato ni ipadayon. Sit down ta sa mga programa, unsay priority nga himuon in every cooperative, then, up to the financial aspects support and then the products. Unsa ang marketing kay kini gyud ang problema kay bisan pa’g dako na kaayo’g produkto ang cooperatives ‘pag walay tamang buying o presyo sa inyong produkto sa inyong gi-produce, mo-down gyud ang cooperative. So, diha ang part sa provincial government. Diha ang akoang part nga matabangan mo nga mahatagan og insaktong presyo ang quality nga inyong gina-produce ug matabangan sab mo in technical support. Then, mag-sit down ta ani for year 2023. Motabang ko sa inyoha kuyog ang atong mga department heads,” saysay ni Kuya Gov.

Ang DNCSFC, gimugna niadtong Hulyo 21, 2009, nga sa pagkakaron adunay mokabat 22 ka mga kooperatibang miyembro nga gilangkoban sa 6,251 coop member beneficiaries. Sa kasamtangan, mobalor sa P4,694,355 ang ilang investment retained earnings ug mokabat ngadto sa sobra Dos (2) bilyones ka pesos na ang ilang napahulam sugod niadtong 2011 hangtud 2022.

Writer/Photo: Nestor Mata, Jr.

 

 

 

DavNor News