Gidal-an og mga food packs ang mga pamilyang residente duol sa sapa sa lungsod sa New Corella, niadtong Enero 20, 2023. Bitbit sa Provincial Social Welfare and Development Office (PSWDO) ang mga kinartong relief goods nga naggikan sa DSWD XI pinaagi sa inisyatibo ni Kuya Gov Edwin I. Jubahib nga dunay sulod unom ka kilong bugas, kape ug mga sud-ang delata. Kini gihatag sa mga biktima sa baha sa tulo ka mga barangay sa New Bohol, Sta. Cruz ug New Sambog sakop sa maong lungsod.

Ang Kapitan sa New Bohol nga si Juanito Jala nagpasalamat kang Kuya Gov sa tabang niini uban sa panghinaut sa dugang hinabang alang sa ilang panginabuhian sanglit nadamyos sa baha ang ilang mga tanom nga maoy ginakuhaan sa ilang kalan-onon.

"Salamat kaayo nga anaa ‘ning assisstance karon. Dako kaayo’g tabang sa amoa labi na gyud sa mga taong apektado kaayo sa baha tungod kay sayod ta nga kasagaran diri sa amoang barangay, naglisud gyud tanan kay gisaligan mao ra tong kahumayan ug kabasakan. Karon sugod na pud sa uno kay nabahaan man," sumala ni Kapitan Jala.

Sa New Bohol, 100 ka mga pamilya ang apektado, 124 sa Barangay New Sambog ug 28 ka mga pamilya usab sa Sta. Cruz.

Writer/Photos: Ma. Lorna P. Tripoli

 

 

 

DavNor News