Gipangunayan ni Governor Edwin “Kuya Gov” I. Jubahib ang pagpanghatag sa family food packs alang sa 126 ka pamilyang apektado sa pagbaha ug kasamtangang anaa sa evacuation center sa Mesaoy Elementary School, New Corella, Davao del Norte, Enero 5, 2023.

Kauban sa gobernador si Rosalinda Rapista ang Head sa Provincial Social Welfare and Development Office, Board Member Popo Estabillo, Vice Mayor Pedro Lagumbay, Konsehal Consaro Sayon, Konsehal Rodolfo Comidoy, kalakip sab ang representante ni New Corella Mayor Jorjan “Monet” Federeso, si Executive Assistant Rolando Tumamac ug Mesaoy Brgy. Captain Gregorio Lahoylahoy.

Sumala ni Kuya Gov nga dili gayud kapugngan ang pagbaha sanglit gikan kini sa kinaiyahan. Apan aduna siya’y gihimo aron mokunhod ang epekto niini, sama sa pagpalapad sa mga kanal ug pagpalawom sa mga kasapaan. Laraw sa gobernador nga maghimo og mga dagkong kanal sa maong barangay aron mahataga’g kasulbaran ang dugay nang problema sa baha.

“𝘚𝘢 𝘱𝘢𝘨𝘬𝘢𝘬𝘢𝘳𝘰𝘯, 𝘢𝘯𝘨 𝘯𝘢𝘩𝘪𝘵𝘢𝘣𝘰 𝘱𝘰𝘳𝘵𝘪𝘰𝘯-𝘱𝘰𝘳𝘵𝘪𝘰𝘯 𝘯𝘢 𝘭𝘢𝘯𝘨 𝘢𝘯𝘨 𝘮𝘨𝘢 𝘯𝘢𝘣𝘢𝘩𝘢𝘢𝘯 𝘯𝘨𝘢 𝘭𝘶𝘨𝘢𝘳. 𝘜𝘨 𝘮𝘢𝘰 𝘨𝘢𝘯𝘪 𝘢𝘬𝘰𝘯𝘨 𝘨𝘪𝘱𝘢𝘯𝘨𝘶𝘵𝘢𝘯𝘢 𝘴𝘪 𝘒𝘢𝘱𝘪𝘵𝘢𝘯, 𝘢𝘴𝘢 𝘯𝘨𝘢 𝘱𝘶𝘳𝘰𝘬 𝘯𝘪, 𝘴𝘱𝘦𝘤𝘪𝘧𝘪𝘤, 𝘢𝘴𝘢 𝘯𝘪 𝘯𝘨𝘢 𝘱𝘶𝘳𝘰𝘬, 𝘱𝘢𝘳𝘢 𝘥𝘪𝘥𝘵𝘰 𝘯𝘢𝘵𝘰 𝘪-𝘦𝘴𝘵𝘢𝘣𝘭𝘪𝘴𝘩 𝘢𝘯𝘨 𝘢𝘵𝘰𝘯𝘨 𝘥𝘢𝘨𝘬𝘰𝘯𝘨 𝘬𝘢𝘯𝘢𝘭, 𝘨𝘢𝘸𝘢𝘴 𝘴𝘢 𝘱𝘢𝘨 𝘥𝘦𝘴𝘪𝘭𝘵𝘪𝘯𝘨 𝘴𝘢 𝘓𝘪𝘮𝘣𝘢𝘢𝘯 𝘊𝘳𝘦𝘦𝘬. 𝘋𝘶𝘯𝘨𝘢𝘨𝘢𝘯 𝘱𝘢 𝘯𝘢𝘵𝘰 𝘢𝘯𝘨 𝘱𝘢𝘨𝘱𝘢𝘭𝘢𝘭𝘰𝘮 𝘴𝘢 𝘓𝘪𝘮𝘣𝘢𝘢𝘯 𝘊𝘳𝘦𝘦𝘬 𝘶𝘨 𝘚𝘢𝘶𝘨 𝘙𝘪𝘷𝘦𝘳. 𝘈𝘯𝘨 𝘱𝘶𝘳𝘱𝘰𝘴𝘦 𝘯𝘢𝘵𝘰 𝘯𝘨𝘢 𝘮𝘢𝘩𝘪𝘮𝘰𝘯𝘨 𝘦𝘱𝘦𝘬𝘵𝘪𝘣𝘰 𝘢𝘯𝘨 𝘢𝘵𝘰𝘯𝘨 𝘱𝘳𝘰𝘨𝘳𝘢𝘮𝘢 𝘭𝘢𝘣𝘢𝘯 𝘴𝘢 𝘣𝘢𝘩𝘢, 𝘯𝘨𝘢 𝘸𝘢𝘭𝘢 𝘯𝘢𝘺 𝘱𝘢𝘮𝘪𝘭𝘺𝘢𝘯𝘨 𝘮𝘢𝘣𝘢𝘩𝘢𝘢𝘯,” saysay sa gobernador.

Nanaad ang gobernador atubangan sa katawhan sa mesaoy, nga iyang himoon ang tanan niyang mahimo aron makamugna og mga programa aron ugma damlag dili na masinatian sa mga katawhan ang kataas sa tubig baha nga ilang giatubang karon.

Nagpaabot sa iyang pasalamat kang Kuya Gov, si Barangay Captain Lahoylahoy, gumikan sa hinanaling tabang nga gipaabot niini sa iyang mga ginsakopan. Nagpasalamat sab kini sa gobernador, gumikan sa mokabat 1.5 milyones ka pesos nga gihatag sa probinsyal nga panggamhanan sa iyang barangay alang sa pag-renovate sa ilahang mini gymnasium aron magamit isip evacuation center.

“𝘗𝘢𝘴𝘢𝘭𝘢𝘮𝘢𝘵 𝘨𝘢𝘯𝘪 𝘵𝘢 𝘴𝘢 𝘢𝘵𝘰𝘯𝘨 𝘩𝘢𝘭𝘢𝘯𝘨𝘥𝘰𝘯𝘨 𝘨𝘰𝘣𝘦𝘳𝘯𝘢𝘥𝘰𝘳 𝘒𝘶𝘺𝘢 𝘎𝘰𝘷 𝘌𝘥𝘸𝘪𝘯 𝘐. 𝘑𝘶𝘣𝘢𝘩𝘪𝘣, 𝘴𝘢 𝘪𝘺𝘢𝘯𝘨 𝘪𝘯𝘪𝘴𝘺𝘢𝘵𝘪𝘣𝘰 𝘨𝘺𝘶𝘥 𝘯𝘨𝘢 𝘯𝘪𝘩𝘢𝘵𝘢𝘨 𝘴𝘢 𝘪𝘺𝘢𝘯𝘨 𝘱𝘢𝘯𝘢𝘩𝘰𝘯, 𝘯𝘨𝘢 𝘮𝘪𝘵𝘶𝘯𝘰𝘭 𝘴𝘪𝘺𝘢 𝘰𝘨 𝘮𝘨𝘢 𝘳𝘦𝘭𝘪𝘦𝘧 𝘨𝘰𝘰𝘥𝘴 𝘶𝘨 𝘶𝘣𝘢𝘯 𝘱𝘢𝘯𝘨 𝘮𝘨𝘢 𝘱𝘢𝘯𝘨𝘪𝘯𝘢𝘩𝘢𝘯𝘨𝘭𝘢𝘯𝘰𝘯 𝘥𝘪𝘯𝘩𝘪 𝘴𝘢 𝘣𝘢𝘳𝘢𝘯𝘨𝘢𝘺 𝘴𝘢 𝘔𝘦𝘴𝘢𝘰𝘺,” pagpasibaw ni Punong Barangay Lahoylahoy.

Nakadawat ang matag pamilya og bugas, tinapa, corned beef ug beefloaf. Samtang nihatag sab og cash si Kuya Gov alang sa mga bakwit aron pangpalit og dugang sud-an.

Sa laing bahin, mokabat sa 33 ka mga barangay ang apektado sa pagbaha sa tibuok probinsya base sa pinakaulahing datus nga gipagawas sa Provincial Disaster Risk Reduction and Management Center, alas 12 sa udto niining adlawa, Enero 5. Kung diin mokabat sa 15,868 ka pamilya nga gilankoban sa 73, 822 ka indibidwal.

Nestor Mata, Jr.

DavNor News