Gitagaan ni Governor Edwin “Kuya Gov” Jubahib og pagkaon, bugas ug konsumo ang 29 ka mga batang tribu ubos sa pag-atiman sa Tatag IP Students Foundation, Inc., sa Tatag IP Complex, Sto. Niño, Talaingod, Davao del Norte.

Ang maong foundation gitukod sa 56th Infantry Batallion, nga karon anaa ubos sa mando ni Battalion Commander LtCol. Osmalik Tayaban, aron hatagan og labing maayong dapit alang sa pagtuon sa mga batang tribo nga giilad ug gipahimuslan sa mga komunistang terorista ug mga leftist organizations, sama sa mga anak sa mga kanhi miyembro sa mga rebeldeng NPA, mga batang IPs nga gikan sa UCCP Haran ug kadtong mga batang tribu nga gitabangan ni Kuya Gov og luwas gikan sa mga kamot sa mga walhon nga NGOs sa Cebu City.

Gikan si Kuya Gov sa Security Briefing nga gihatag ni 56th IB Executive Officer Maj. Russel Anthony Bumanglag. Apil sa nahisgutan ang hiniusang programa sa probinsya ug sa Tatag Batallion aron sa paglig-on sa mga programa ug proyekto alang sa kalinaw ug kalamboan sa mga tribu.

Bisan pa sa pag-ipit sa Sangguniang Panlalawigan (SP) sa budget ni Kuya Gov alang Peace and Order Program ug sa ilang pagwala sa iyang Confidential Fund, padayon nga gilig-on sa gobernador ang iyang programa sa kalinaw, aron sa paglahutay sa deklarasyon sa Davao del Norte isip “Insurgency-Free Province” ug aron masiguro nga dili na mobalik ang problema sa insurhensiya sa probinsya.

 

 

 

DavNor News