Malampuson nga nadepensahan ni IP Board Member Ariel Macla ang iyang titulo isip Provincial Indigenous Peoples Mandatory Representative (IPMR) sa Sangguniang Panlalawigan (SP) sa Davao del Norte, sa gipahigayon nga eleksiyon ganinang buntag sa VIP Lounge, Clubhouse, DNSTC, Mankilam, Tagum City.

Kinse ka boto ang nakuha ni BM Macla sa 24 ka boto sa mga IPMR representatives ug tribal chieftains aron mapildi niya si Datu Francisco Bucadon, ang IPMR sa lungsod sa B.E. Dujali, rason nga masumpayan ang tulo na ka tuig nga iyang pag-alagad isip IP Board Member.

Nalipay kaayo si Governor Edwin “Kuya Gov” Jubahib sa pagbarog sa mga tribal leaders aron sa pagsuporta sa iyang gituboy nga kandidato, sanglit ang kadaugan ni Macla dakong tabang aron sa pagpadayon sa iyang executive agenda alang sa kalamboan sa probinsya.

“Dako kaayo ang iyang ikatabang sa Sangguniang Panlalawigan nga mohatag suporta sa tanan natong maayo nga plano para sa development ug paghatag ug maayong serbisyo sa kaigsoonang IPs, ug usab sa tanang katawhan sa Davao del Norte,” sulti sa gobernador.

Ang kadaugan ni BM Macla nagpasabot lang nga ang mga kaigsoonang IPs anaa ang ilang dakong pagsalig sa atong liderato as governor, nga mapadayon nato ang mga maayo nga programa ug kaayuhan para sa ilang kalamboan,” dugang pa niya.

Butyag ni Kuya Gov nga iyang ipadayon ang desente nga housing projects alang sa tribu, apil ang pag-abli sa dugang kadalanan, eskwelahan, health center, panginabuhian ug uban pang serbisyo sa mga komunidad sa mga IPs.

 

 

 

DavNor News