Hingpit ang suporta ni Governor Edwin "Kuya Gov" Jubahib sa 2023 Ironman 70.3 Davao, nga ipahigayon karong Marso 26, 2023 human ang tulo ka tuig nga pag-undang niini tungud sa pandemya.

"100 percent ang support natin para sa Ironman event," maoy pasalig ni Kuya Gov sa mga organizer sa nag-unang triathlon event sa rehiyon.

Nakigpulong kang Kuya Gov sila Ironman Philippines General Manager and Regional Director Princess Galura, Davao City Administrator Atty. Tristan Dwight Domingo, ug Davao City Sports Development Division head Michael Aportadera, kauban si DILG-XI Regional Director Alex Roldan.

Nagpasalamat si Kuya Gov nga apil gihapon ang Davao del Norte sa ruta sa Ironman, kay "sigurado ako na mas makilala ang Davao del Norte sa sports tourism map."

Mipasalig ang gobernador nga himuon sa probinsiya ang tanang preparasyon aron masiguro nga luwas ang mga atleta ug mga bisita anang adlawa, sama sa pagsiguro sa seguridad, pagbutang sa mga ambulansiya ug rescue vehicles, pag-andam sa mga hospital kung dunay emerhensiya, pag- andam sa kadalanan ug uban pang logistics support.

Naglaum ang mga organizers nga kapin 3,000 ka mga atleta ang mosalmot sa padula, kuyog ang kapin napu ka libo ka mga bisita sa event, nga mosubay sa 1.9-kilometer nga langoy sa Davao Gulf, 90-km nga bike ride gikan Bajada, Davao City hangtud Tagum City ug pabalik, ug 21-km nga dagan gikan sa NCCC Victoria Plaza hangtud Azuela Cove ug pabalik.

 

 

 

DavNor News