Gipasalamatan ni Undersecretary Alan Tanjusay sa Department of Social Welfare and Development (DSWD) si Governor Edwin "Kuya Gov" Jubahib sa iyang dakong suporta sa mga programa sa ahensiya, samtang midayeg siya sa kalampusan sa programang ending local communist armed conflict (ELCAC) sa probinsiya.

Mibisita sa probinsiya si Tanjusay, ang DSWD Undersecretary for Inclusive and Sustainable Peace, aron hisgutan ang Barangay Development Program (BDP) sa atong GIDAs communities, labi na sa Talaingod ug tan-awon ang mga proyekto sa ahensiya nga nagtagad sa kaayuhan sa mga kanhi rebelde, kon Friends Rescued (FRs) ug sa ilang pamilya.

Apil niini ang proyektong Livelihood Settlement Grants (LSG), aron makasugod ang mga FRs sa ilang panginabuhian, sama sa livestock production, negosyo ug uban pa.

Giadtuan sab sa opisyal ang Freedom Residences, nga pabalay sa FRs sa Cuambogan, Tagum City.

Nagpasalamat si Tanjusay kang Kuya Gov kay iyang gipahiluna ang DSWD Provincial Field Office nga nahimutang karon sa Davao del Norte Sports and Tourism Complex, lakip na ang gihatag niyang bug-os nga suporta aron magmalampuson ang mga programa ug proyekto sa ahensiya sa probinsiya.

Nakadayeg sab siya sa mga programa ug serbisyo ni Kuya Gov alang sa mga FRs ug sa iyang tanang programang pangkalamboan ug kalinaw aron mahimong "insurgency-free" ang probinsiya.

Gisiguro ni Kuya Gov kang Tanjusay nga iyang himuon ang tanan aron dili na mobalik ang problema sa insurhensiya sa Davao del Norte.

 

 

 

DavNor News