Paningkamutan ni Governor Edwin "Kuya Gov" Jubahib ang paghatag og dugang suporta sa mga atleta nga nagdala sa pangalan ug dungog sa probinsiya.

Gipasalig sa gobernador ang dugang insentibo sa mga atleta, gawas sa ilang pamilete ug allowance, ug padayon nga libreng paggamit sa pasilidad sa sports complex, atul sa pag-courtesy call kaniya sa 50 ka mga mananaog nga batang atleta nga mirepresentar sa probinsiya.

Ang DavNor Team nakasakmit sa daghang mga medalya sa ilang pagsalmot sa nagkalainlaing sports competition sa sulod ug gawas sa nasud sa miaging tuig.

Lakip niini ang 15 ka gold medal, 11 ka silver ug 26 ka bronze sa gipahigayon nga World Eskrima Kali Arnis Federation (WECAF) World Championship sa Mandaue City, Cebu niadtong July 17-22, 2022; tulo ka gold, usa ka silver ug usa ka bronze medals nga gihakot ni Christian Gian Karlo Arca sa Eastern Asian Youth Chess Championship niadtong Nobyembre 4-13, 2022 sa Thailand; 12 gold, 19 silver ug 22 bronze sa 2022 National Batang Pinoy sa Vigan City, Ilocos Sur niadtong Disyembre 17-21, 2022; 12 ka gold, five ka silver ug unom ka bronze sa Philippine Eskrima Kali Arnis Federation (PEKAF) Mindanao Qualifying League sa Sultan Kudarat niadtong Nobyembre 18-20, 2022; ug, usa ka silver medal atul sa 2022 PSI Prix National Swimming Championship niadtong Nobyembre 2022 sa Capas, Tarlac.

Sa pagkakaron, ang mga mananaog nga mga atleta sa probinsiya makadawat og P5,000 sa ilang makuha nga gold medal, P3,000 sa silver ug P2,000 sa bronze sa national competition, samtang makadawat sab sila og P3,000 gold, P2,000 sa silver ug P1,000 sa bronze sa regional competition.

"Dala sa atong mga atleta ang pangalan sa atong probinsiya busa dapat lang nga suportahan nato sila," sulti ni Kuya Gov.

 

 

 

DavNor News