Andam na ang Davao del Norte sa pagdawat sa mas daghan nga mga lokal ug langyaw nga mga turista sa paghuman sa 10 ka mga tourism projects, ubos sa P200-million Tourism Development Project ni Governor Edwin "Kuya Gov" Jubahib.

Sulti sa gobernador nga tumong sa proyekto nga pakusgan ang turismo sa probinsiya aron makamugna sa mas daghang trabaho ug panginabuhian sa katawhan.

"Tuyo nato nga modani sa mas daghang turista aron mo-create ni siya og daghang trabaho ug gagmay'ng negosyo nga makapalambo sa atong katawhan," sulti ni Kuya Gov, atul sa pag-abli sa bag-ong mga pasilidad sa Panas Eco-Cultural Park sa Barangay Carcor, New Corella, Davao del Norte.

Gipundohan sa maong proyekto ang bag-ong adult ug kiddie pools nga dunay shower ug dressing room, mga cottage, reception hall building ug grand entrance sa gibantog nga Panas resort, nga mokabat ngadto sa P10 million.

Dugang sa gobernador nga giandam na sa probinsiya ang mas nindot nga mga tour packages alang sa mga turista, aron ilang hingpit nga ma-enjoy ang "Island to Highland Experience" sa Davao de Norte.

Gibantog ang probinsiya dili lang sa adventure attractions niini, kay apil sa ginahanyag niini ang culture and traditions ug agri-tourism destinations.

Ingon sa gobernador nga walay angay kabalak-an ang mga turista sanglit dili na gubot ang probinsiya tungod kay "insurgency-free" na kini.

Kahinumduman nga ang Davao del Norte ang pinaka-unang probinsiya sa Davao Region nga nadeklarang “insurgency-free” tungod sa aktibong pagpatuman ni Kuya Gov programang ending local communist armed conflict (ELCAC).