Malampuson ang gipahigayong Consultative Meeting on Hand, Foot and Mouth Disease, nga gipangunahan sa Provincial Health Office, sa Bulwagan ng Karunungan, Provincial Government Center, Mankilam, Tagum City, niadtong Pebrero 6, 2023.
Gihimo ang maong panagtapok aron hisgutan ang mga pamaagi sa pagsumpo sa pagkuyanap sa Hand, Foot and Mouth Disease (HFMD) dinhi sa probinsya. Gitambongan kini sa mga doctor ug nurses gikan sa upat ka division sa DepEd nga mao ang Tagum City Division, Panabo City Division, Island Garden City of Samal Division ug Davao del Norte Divison, kalakip sab ang personahe sa PSWDO, MSWDO, CSWDO nga naglihok sa mga Day Care Center, ug mga personahe sa health gikan sa 11 ka Local Government Units (LGU).
Gihisgutan sab ang pagpakusog sa pagsabwag sa tamang impormasyon may kalambigitan sa maong sakit ingon man ang angayang buhaton sa pagkontrola niini.
Sumala ni Dra. Eleanor H. Salva, MCH, Ed.D, DavNor Provincial Health Officer 1, nga gihimo ang maong konsultasyon aron mahibaloan ang mga pamaagi sa pagpakusog sa programa nga makapugong sa pagkuyanap sa HFMD. Iyang gisaysay ang mga sintomas nga mamatikdan sa pasyente panahon nga mataptan kini sa sakit.
“Nagpatawag mi’g meeting para i-discuss karong adlawa ang kanang ginaingon namo’g Hand, Foot, and Mouth Disease. Isa man gud ni sa ginaingon namo sa surveillance system nga bantayanan, nga kinahanglan nga kung adunay mga kaso niini i-report gyud within 24 hours. So, makuha ni siya sa hangin, direct contact, pwede pud sa hugaw sa positibo nga pasyente. Ang ma-feel ani sa mga pasyente; kalintura, dayon naay manurok sa ilang panit gapula nga naay tubig, medyo katol, ang pagturok ani walay pili. Kasagaran ani makit-an sa baba, sa dila, sulod sa baba, naa pod sa kamot, sa palad, sa bukton hangtud sa tiil, makita na siya,” sumala ni Dra. Salva.
Dugang ni Dra. Salva, nga walay tambal ang maong sakit apan dili angay mabalaka ang mataptan niini sanglit motapot kini sa pasyente gikan sa 7 hangtud sa 14 ka adlaw lamang. Apan kung padayon gihapon ang maong sakit, giawhag ang mga mataptan sa pagkonsulta sa doktor.
Sa habig sa Department of Education, gikanayon ni Dr. Dasbir C. Sohal, ang Medical Officer sa DepEd Tagum City Division, nga pakusgan pa nila ang mga programa alang sa kalimpyo sa mga magtutungha sanglit ang sakit nga HFMD nagikan man sa virus nga makuha gikan sa kahugaw. Ilang pakusgan ang Wash In School program kay isa kini nga dunay dakong ikatabang sa pagsumpo sa pagkuyanap sa kagaw tali sa mga estudyante.
“So, what we plan for the DepEd is intensify Wins Program. Aside ana, unsaon nato pagpakabalo sa ilaha, unsaon pag-prevent is through IEC, Information Education Campaign. Ang among plano is mag-IEC mi, which we already did last week, last Friday sa mga division personnel namo through sa 3KP na program, wellness program. Katong mga prevention nga methods mao to ang among i-drive sa tanan aron dili magka-outbreak,” pagsubay ni Dr. Sohal.
Dugang saysay ni Dr. Sohal, nga ilang gihulat karon ang official memo gikan sa DepEd Region XI alang sa guidelines kun ugaling man dunay estudyante nga mataptan sa HFMD.
Writer/Photo: Nestor Mata, Jr.
