Nahimo nang’ tinuig nga tradisyon ni Kuya Gov Edwin Jubahib ang pagpanghatag og mga bulak ug tsokolate sa mga magtutudlo sa Davao del Norte matag Valentine’s Day.
Karong tuiga, si Kuya Gov mismo ang mitunol sa red roses ug chocolates sa tagsa-tagsang magtutudlo sa piniling mga tulunghaan sa Probinsya.
Matod ni Kuya Gov, dunay espesyal nga lugar sa iyang kasingkasing ang mga titser; tungod sa mga sakripisyo niini sa pag-edukar ug pag-amuma sa kabatan-onan. Rason nga ang maong sektor ang napili niya isip iyang Valentine’s date.
“Gi-value gyud nako, gi-honor, and gi respect ang tanang effort sa usa ka teacher nga naghatag og knowledge ug values, nag-change sa character sa usa ka bata… Karon nga adlaw nga gicelebrate nato ang Hearts Day o Valentine’s day, sila gyud ang akong gipili tungod kay agi og pasalamat sa tanan nilang gihimo for the whole year… Gani, gusto nako tanan gyu’ng teachers sa Probinsya. Siguro next year, pangitaan jud nako na’g budget nga mahatagan ang tanan… Agi og pagrecognize sa tanan nilang nahimo, pagpasalamat sa ilaha, ug pagpasabot na sila gihatag natog dakong pasidungog ug paghigugma,” butyag sa gobernador.
Sa pagbisita ni Kuya Gov, wala gipalabay sa mga maestro ug maestra ang oportunidad nga mapadayag sab ngadto sa gobernador ang mga panginahanglanon sa ilang eskwelahan. Bisan pa man nga gawas na kini sa iyang kaakohan, walay pagduha-duha nga gitubag ni Kuya Gov ang hangyo sa school faculty.
“Isip governor, dili lang tungod kay naa sa City ang maong mga schools, nga dili nata muhatag og tabang sa ilaha o support. Obligasyon gihapon nako nga motubag sa ilahang mga panginahanglan o request sa ilahang mga eskwelahan. Atleast matabangan pud nato nga mas mahimong proper o decent ang mga eskwelahan o classroom nga ilahang pagatudloan.”
Samtang, puno sa gugma ug kamaya ang kasing-kasing sa mga maestra ug maestro nga nakadawat og pahalipay gikan kay Kuya Gov. Sumala pa ni Ma’am Mergie Hondrada, Principal IV sa Magugpo Pilot Central Elementary School, kini ang unang higayon nga ang gobernador mismo ang personal nga mibisita, mi-abi-abi, ug mitunol og regalo sa tagsa-tagsang magtutudlo.
“One of a kind… Lahat ng teachers now are very happy. Kanina nga, very excited kaming lahat kasi we feel the love of Governor Jubahib. We feel the generosity. We feel really his kindness… Tsaka yung mga wishes namin come true. Yung sinasabi naming requests… Granted po niya lahat ng mga request namin. Wala pong hinindian si Governor Jubahib,” padayag sa school principal.
Lakip sa mga tulunghaan nga gibisita ni Kuya Gov atol sa Valentine’s Day mao ang Magugpo Pilot Central Elementary School, Magugpo Pilot Imelda Elementary School, Tagum City National High School, ug La Filipina National High School.
Writer: Kelly Lobitos
