Mokabat sa 150 ka mga banana growers nga biktima sa fusarium wilt (panama disease) ang nahimong unang benepisyaryo sa DavNor KAAGAPAY Corn Program ni Governor Edwin “Kuya Gov” Jubahib, atol sa paglusad niini nga gipahigayon sa VIP Clubhouse, DNSTC, Mankilam, Tagum City, niadtong Pebrero 21, 2023.
Sumala ni Alphabet G. Gulanes, RA, MM, ang Senior Agriculturist sa Provincial Agriculturist Office, nga gihimo ang launching sa KAAGAPAY Corn Program aron matabangan ang mga banana farmers nga naundang sa ilang pagpananom og saging sanglit giatake kini sa panama disease. Dugang ni Gulanes nga mokabat 50 ektaryas nga umahan ang pasiunang tabangan ni Kuya Gov gikan sa semilya, abono ug hangtud sa pagpangita og buyer panahon nga i-harvest na kini.
“Kani nga activity kay ang launching sa KAAGAPAY Corn Program ni Kuya Gov alang sa mga fusarium affected areas, kay kabalo ta nga ubay-ubay na gyud ang naapektohan sa fusarium. Dugay na sila nangayo og tabang sa atoa. Si Kuya Gov nangita gyud og paagi para matabangan sila nga mga farmers. So, initially ang tabang nga ihatag ni Kuya Gov ang package ng corn with fertilizer at the same time with TUPAD. So, kani karon ang first batch gina-orient at the same time ang second batch, kay ang gusto ni Kuya Gov nga ang kwarta sa gobyerno mapatuyok sa tanang banana farmers,” matud ni Gulanes.
Gisaysay ni Kuya Gov atubangan sa mga benepisyaryo, ang iyang mga gihimo aron mahatagan og hinanaling aksyon ang pagpakgang o pagkontrola sa sakit nga fusarium. Apan pakyas kini kay bisan ang iyang mga naistorya nga mga sayantipiko nga nagikan sa nasud Israel, South Korea ug China, wala kini nakahatag og insaktong solusyon ug tambal alang sa maong sakit. Gihanyag sa gobernador ang backhoe nga bag-o lang napalit sa probinsya nga libre kining magamit sa mga mag-uuma aron mapadali ang ilang pag-ugmad sa yutang tamnan.
“Kani man gong pagpananom og mais, four months pa usa mo makakwarta kay 105 days ang harvest. Unya ang presyo, naghimo ta’g ceiling price sa farmgate price, dili mobaba sa 17 pesos ang presyo sa mais. So, mao ni nga program nga atong gilunsad nga karong tuiga paningkamotan nako, pinaagi sa tabang sa Asean Hybrid Technical Working Group, sa PAGRO, nga kining tanan affected nga 1000 families matabangan nato tanan for this whole year,” saysay ni Kuya Gov.
Madawat sa mga benepisyaryo ang duha (2) ka bag sa hybrid nga semilya sa mais ug abono nga libreng gihatag kanila ni Kuya Gov. Kalakip sab sa ilang madawat ang kantidad P4,430.00 matag usa gikan sa Department of Labor and Employment (DOLE) ubos sa programang TUPAD o Tulong Panghanapbuhay Para sa Mga Displaced/Disadvantaged Workers.
Dako ang kalipay nga gibati sa mga benepisyaryo ug nagpaabot sa ilang pasalamat kang Kuya Gov gumikan sa pagpaningkamot niini nga matabangan ang mga biktima sa fusarium wilt disease.
Writer/Photo: Nestor Mata, Jr.
