Nibisita sa Davao del Norte ang mga personahe sa LGU General Santos City aron mag-benchmark kabahin sa Procurement System & Facilities sa Bids & Awards Committee (BAC) ug uban pang mga sulondong buhat sa probinsya, niadtong Pebrero 2, 2023.
Gisugat ni Provincial Administrator Engr. Josie Jean Rabanoz ug PHRM Officer Edwin Palero ang mga bisita diin gisaysay ni Rabanoz ang mga nag-unang programa sa probinsyal nga panggamhanan ubos sa administrasyon ni Governor Edwin “Kuya Gov” Jubahib, sama sa Zero Billing sa mga Provincial Hospital, ang hi-tech nga Command Center sa PDRRMC, pagdeklara sa DavNor isip insurgency free province, ang flagship program DavNor KAAGAPAY ug daghan pang uban.
Sa mensahe ni Palero, iyang gisaysay ang kamahinungdanon sa digitalization sa mga proseso sa gobyerno sanglit makatabang kini’g dako sa paspas nga paghatag serbisyo sa publiko. Kinahanglan matud pa, nga mo-invest ang mga LGU sa digitalization og manpower nga mogunit niini aron magmalampuson ang maong programa.
“To sustain the program, to sustain the institutionalization of reforms in governance you need to change your mindset. Not only your mindset but the mindset of the people around you towards digitalization. Because whether we like it or we like it, naa na gyud ‘ning technology or you will be left behind. And, when we talk about technology, we need to invest. We need the support of people not only in the executive but everything within the institution,” sulti ni Palero.
Nagpaabot sa iyang pasalamat sa Probinsyal nga Panggamhanan si Lou Bernandino, ang Spokesperson sa LGU Gensan, ilabi na kang Kuya Gov gumikan sa mainitong pagdawat kanila. Sumala ni Bernandino, nga daghan sila’g nakat-onan nga mga sulondong binuhatan sa DavNor nga pwedeng magamit sa ilang LGU.
“Malipayon kami nga nakaanhi kami dinhi. Labi na gyud ang inyohang pag-asikaso namo, murag way limit ang pagkaon perteng daghana. So, makalipay kaayo. Magpasalamat pod ko sa inyohang halangdong Gobernador si Kuya ug labi na sa tanang katawhan nga naglihok, sa mga empleyado nato nga nagadumala dinhi sa atong panggobyerno, salamat kaayo sa oportunidad nga gihatag kanamo aron kami makasundog pud sa mga nindut nga pamaagi sa inyong panggobyerno para dungan kitang molambo ug mosaka,” matud ni Benandino.
Nahingangha ang mga delegado labi na sa ilang nasud-ong nga PDRRMO Command Center diin makita ang hi-tech nga monitoring system, nga nakamontar sa nagkadaiyang kasapaan ug kadagatan palibot sa probinsya. Gidayeg sab nila ang procurement system nga paspas kaayo ang proseso.
Dako ang kalipay nga gibati sa mga bisita sanglit daghan kini nakat-onan sa ilang pag-anhi sa probinsya nga ilang madala ini’g balik sa ilang LGU.
Writer: Nestor Mata, Jr
