Sa wala pa gipatuman ni kanhi Presidente Rodrigo Duterte ang Executive Order (EO) No. 70 aron taposon ang armadong pakigbisog sa nasud, gisugdan na daan ni Governor Edwin "Kuya Gov" Jubahib ang localized peace engagement (LPE), bisan wala pa siya sa gobyerno.
Isip pamatuod, si Undersecretary MGen. Ernesto Torres, Jr., ang Executive Director sa National Task Force to End Local Communist Armed Conflict (NTF-ELCAC) midayeg sa dakong papel ni Kuya Gov sa pagpasurender kay Datu Guibang Apoga sa Sitio Nasilaban, Dagohoy, Talaingod, Davao del Norte niadtong Hunyo 2018.
Commander pa si Torres sa 1003rd Infantry Brigade anang panahona, samtang si Kuya Gov personal assistant pa ni kanhi House Speaker ug 1st District Congressman Pantaleon Alvarez.
Butyag ni Torres nga gipauban jud niya si Kuya Gov sa kuta ni Datu Guibang kay sa iyaha lang gastorya ang tribal leader.
Ingon ang opisyal nga usa kini ka hingpit nga ehemplo sa LPE, kon local peace talks, ug nga gipaningkamotan jud nila nga mahatag ang mga demand sa tribal leader.
"Hindi pa na-institutionalized ang Localized Peace Engagement ginawa na natin sa Davao del Norte," butyag ni Torres, sa iyang pagpamulong, atul sa gipahigayon nga workshop sa "Transformation Program for Former Rebels and their Fàmilies and Communities" sa Blue Lotus Hotel, Davao City.
Tuod man, milampos sila sa pagkumbinse aron mobalik sa sabakan sa balaod si Datu Guibang, human ang duha ka dekada nga pakigbatok sa gobyerno. Kuyog niya misurender ang kapin 300 nga iyang ginsakupan.
"It is a typical example of an effective local peace engagement. The rest is history. Nag-surrender si Datu Guibang... All the Salugpungan schools were closed. The confidence of the IPs, especially the FR IPs was engaged," dugang ni Torres.
Paglingkod ni Kuya Gov isip gobernador sa tuig 2019, nanguna siya sa pagpatuman sa lig-on nga LPE aron magmadaugon ang probinsiya sa pagtapos sa insurhensiya, rason kini nga nahimong pinaka-unang madeklara ang Davao del Norte isip "insurgency-free province" sa miaging tuig.
Gipasigarbo ni Kuya Gov sa maong okasyon ang daghang kalampusan sa LPE sa probinsiya agi'g suporta sa programang ELCAC.
Apil niini ang pagtukod sa 425 ka tribal housing project, 76 classrooms, 11 water systems, pag-abli sa 42.2-kilometro nga dalan nga mobalor og P195 million, pagluwas sa 160 ka pamilyang tribo gikan sa Haran, paghatag panginabuhian sa IPs pinaagi sa DavNor KAAGAPAY Program, paghatag og P20-million ECLIP assistance alang sa 520 FRs, paghimo sa Talaingod gikan sa lungga sa terrorismo ngadto sa tourist destination, ug daghan pang uban.
Kini ang mituklod sa kapin 3,000 ka mga NPA ug miyembro sa Militia ng Bayan aron mosurender kay Kuya Gov.
