"I feel the misery of the people" rason sa akong pagbarug sa entablado nga sa pinakaunang higayon akong gihimo. Isugal ko akong kredibilidad, seguridad ug negosyo aron pangunahan ang mga konsumante sa singgit nga DANECO undang na!”

Kini ang makusganong gipamulong sa Business Tycon ug LYR Group of Companies CEO Larry Rubinos batok sa sistema ug pagdumala sa NORDECO ang kanhing DANECO.

Kapin tres mil ka mga katawhang konsumante ang nitambong sa rally sa may Rotary Club of Tagum niadtong Marso 13 ug unang nagpahigayon sa awareness caravan libot sa mga nag-unang kadalanan sa siyudad sa Tagum. Ang maong pundok gipangunahan sa Tagum City Chamber of Commerce and Industry, Inc. (TCCCI), Davao Consumers Movement ug mga yanong lungsoranong konsumante.

Si Rubinos maoy pinakaulahing namulong gikan sa unom ka speaker sama nila ni Engr. Errol Conde, Engr. Dadoy Dagaang, Dr. Bernardo Ang, usa ka Surgeon, Mr. Virgilio Agunod ug Ryan Amper, ang co-convenor sa Davao Consumers Movement. Silang tanan nagpasibaw sa ilang tinguha nga pahawaon na ang NORDECO isip nag-inusarang power service provider sa Tagum City ug sa mga kasikbit nga mga dapit.

Gibatbat sa mga speakers ug gi-kwestiyon ang dili maayong serbisyo niini ug ang grabeng taas nga singil, ang system loss, capital expenditures, business tax, real property tax ug uban pang charges sa Power Bill nga ang katawhang konsumante ang nagbaguod sa pagbayad.

Dako ang pagtoo sa maong pundok nga dili kini makatarunganon ug naghinobra na. Gisaysay ni Rubinos ang iyang kaluoy sa iyang mga trabahante gumikan sa pag-apas sa pagbayad sa kamahal sa kuryente. Emosyonal nga gipahayag sa negosyante nga bisan pa matag semana nga rally bitbit ang kawsang palagputon ang NORDECO, iya kanang buhaton.

Iyang gipasabot nga utang kabubut-on niya sa mga katawhang Tagumeños ang iyang pagkaadunahan karon ug sa panahon nga sama niini nga nipatigbabaw ang mulo ug tiyabaw sa mga katawhan, si Rubinos mismo, sumala niya, iyang buhaton ang tanan aron dunggon kini ni Presidente Bongbong Marcos, Jr.

"Ako, nanghinaot gyud ko nga kinahanglan moadto ko sa Malakañang, moadto ko ni Vice President kay amiga mi ana nga mohangyo ko nga tabangan ko, tabangan nato ang Davao del Norte," sumala ni Rubinos.

Samtang kahinumdoman nga nipasaka sa susamang petisyon sa kongreso ug senado si Kuya Gov Edwin Jubahib apan gi-veto kon gibasura kini ni President Bongbong Marcos.

Ang maong pundok positibo karon nga subling iapila ngadto sa presidente ang tinguhang maundang na ang pagdominar sa NORDECO isip power service provider sa siyudad sa Tagum ug sa ubang dapit. Gibatbat ni Rubinos nga pakyas ang maong electric utility sa paghatag sa serbisyo labi na karon nga ang siyudad nitikang na paingon sa industriyalisasyon.

Writer/Photo: Lorna P. Tripoli

 

 

 

DavNor News