Gisugdan na ang unang hugna sa pagpang-apod-apod og food packs ngadto sa mga Muslim communities sa Davao del Norte isip pakigduyog ni Gobernador Edwin “Kuya Gov” Jubahib sa umalabot nga selebrasyon sa Ramadan sunod semana.

Sa panguna ni Provincial Indigenous People Mandatory Representative (IPMR) Board Member Ariel Macla uban ang grupo sa Provincial Governor’s Office (PGO), gituyok ang mga barangay sa siyudad sa Tagum aron ipaabot sa mga Masjid o Mosque ug bisa’g sa Tagum City Jail ang 10 kilo nga asukar, 50 kilo nga harina, 1 sako nga bugas, 3 pakete nga kape, mga kalendaryo ug newsletter.

Matud pa ni Board Member Macla, dako kaayo ang kasingkasing ni Kuya Gov ngadto sa mga kaigsuonang Muslim maong kada tuig gayud siya nagapahigayon og assistance distribution alang sa pagselebrar sa Ramadan.

“Ginahimo ‘ni ni Kuya Gov kada tuig sukad sa iyang paglingkod. Iyaha na ‘ning practice isip iyang suporta sa mga kaigsuonang Muslim. Maong dako ang pasalamat sa atong mga Muslim Leaders nga wala gyud naundang kining maong buhat,” pagsaysay ni Provincial IPMR Macla.

Nagpadayag sab si Datu Arman Maraog, taga-Purok 5, Barangay Busaon ug dunay 70 ka tawo nga sakop, sa iyang dakong pagpasalamat tungod sa mga nadawat nga hinabang gikan kang Kuya Gov.

“Sa ako lang, pagpasalamat sa tabang karong Ramadan… kay ang mga tawong magpuasa, magkinahanglan pud ani. Ang ako lang, mapasalamaton ang mga tawo ilabi na ko na ako ang Datu sa lugar, magpasalamat ko kay Kuya Gov,” sulti ni Datu Maraog.

Magpadayon pa sa Marso 17, 2023 ang pagpang-apod-apod sa mga food packs sa ubang munisipyo ug siyudad sa probinsya. 

Writer/Photo: Danica Delight Villanueva

 

 

 

DavNor News