Gipasidunggan ni Kuya Gov Edwin I. Jubahib ang 278 ka mga empleyado ug ubang department heads sa Provincial Capitol gumikan sa kontribusyon niini sa kalampusan sa mga aktibidad nga gipaluyohan sa probinsyal nga panggamhanan. Sa gipahigayong Gantimpala Agad Award niadtong Marso 16, 2023 sa Bulwagan ng Karunungan, Provincial Capitol gihatagan ni Kuya Gov og sertipiko ug tumbler ang mga awardees pinaagi sa pagpanguna sa Provincial Human Resource Management Office.

Giila sa gobernador ang abilidad, kakugi ug dasig nga pagpanerbisyo sa mga empleyado sa pag-host sa Davao del Norte 2023 Civil Service Commission Mindanao Cluster Sports, Recreation and Physical activities niadtong Pebrero otso hangtud 10, sa Davao del Norte Investment Conference (DavNor Icon) nga naghatud sa dakong posibilidad sa pagsulod sa bilyones ka pesos nga investment gikan sa lokal ug langyaw'ng investors, pagpasar sa Nursing Board Exam, Licensure Examination for Teachers ug Career Service Professional Exam niadtong Agosto 2022. Sa sertipikong ilang nadawat gisaysay ni Kuya Gov Jubahib ang ilang mga talagsaong pagpanerbisyo ingon man ang paghatod nila’g garbo ug dungog sa mga pasadong empleyado.

Gipasabot ni PHRMO Head Edwin Palero nga ang gobernador dili magpanuko sa pag-ila sa mga empleyadong nakahimo og mga maayong panag-ingnan alang sa uban.

"Diri sa probinsya sa Davao del Norte makit-an gani sa inyong supervisor nga naay maayong kontribusyon ang inyong gihimo alang sa mandatus sa inyong opisina o probinsya, di gyud magpanuko si Kuya Gov nga mohatag sa inyo’g award. Kanang pagdawat ninyo sa award sama ra nga ang invisible hand ni Kuya Gov nipikpik sa inyong abaga og miingon Mr, Miss, Pare, Mare, job well done," saysay ni Palero.

Bisan Job Order ug unsang estado sa employment, nihimo’g lakang si Kuya Gov aron mabuboan og mga benipisyo sama sa bunoses ang mga J.O's, dugang butyag ni Palero.

"Kana gihatag tungod kay si Kuya Gov nagtan-aw alang sa mga kaayohan sa tanang empleyado, whether plantilla ka man, job order o unsa man, nangita siya’g paagi nga tanan makabenepisyo,” sigon sa PHRMO Head.

Samtang kalakip usab sa Gantimpala agad awardees ang pipila ka mga department heads sama kang PSYDO Head Gulanes, PICKMO Head Dr. Mervin Jay Suaybaguio ug uban pa. Ang tulo ka hugna sa pagtunol sa sertipiko gitambongan sa mga nahisgutang department heads ug PD DILG Leybag, OSS Assistant Head Alex Delola ug uban pa.

Writer/Photo: Lorna P. Tripoli

 

 

 

DavNor News