Gipresentar sa media ni Governor Edwin “Kuya Gov” Jubahib, ang bag-ohay pa lamang nibalik sa sabakan sa balaud, ang tigpamaba sa grupong PASAKA (Pasakkaday Salugpongan Kalimuddan) Datu Tungig Mansumuy-at, sa VIP Clubhouse, DNSTC, Mankilam, Tagum City niadtong Marso 22, 2023.
Kauban sa gobernador ang kadagkoan sa kasundalohan nga sila si Col. Marion Angcao ang komander sa 1003rdInfantry Brigade ug Lt. Col. Osmalik Tayaban ang komander sa 56thInfantry Batallion.
Gisaysay sa gobernador ang iyang pagpaningkamot aron pagkombinse ni Datu Tungig nga mosurender na. Matud pa sa gobernador nga dugay nang panahon nga siya nagalihok sa pagkombinser sa nahisgutan apan pakyas siya. Sa pagkakaron, tutokan ni Kuya Gov ang paghatag sa mga hinanaling panginahanglanon sa mga nisurender nga sarang ilang magamit sa pang-adlaw adlaw nga panginabuhi.
“Paningkamotan lang sa nato nga ma-provide ang needs aning mga nagsurender karon. Kinse ni sila ka buok. So, dako-dako gyud ni nga budget pero dili man pwede nato himuong hindrance nga zero tag confidential fund. Kay as a governor obligasyon pud nako nga matubag ning ilahang mga special needs para mapadayon ang atong kalihokan pangkapayapaan, dinhi sa probinsya sa Davao del Norte,” sumala sa gobernador.
Gibutyag ni Lt. Col. Tayaban, ang komander sa 56thInfantry Batallion, nga tanang mga miyembro sa rebeldeng New People’s Army diin 80 porsiento kanila gikan sa lungsod sa Talaingod ang ilahang napasurender kalakip ang mga miyembro sa pundok ni Datu Tungig.
“So, itong nangyaring mga surrenderees from the armed group and from the front organization or legal organization, resulta lang ito ng institutionalization ng ELCAC. Sa pamumuno ng ating mga local chief executive kagaya nina governor at nina mayor and other government officials,” matud ni Lt. Col. Tayaban.
Gibutyag ni Datu Tungig ang iyang mga kasinatian samtang anaa pa sa kalihokan ug ang dakong hinungdan sa iyang pagbalik sa sabakan sa balaud sulod sa kapin walo ka tuig nga aktibo sa kalihokan. Dugang niya, nga iyang nakita ang kabag-ohan sa pamuyo sa ilang mga kanhing kaubanan nga una nang nisurender ug ang gipakitang suporta sa gobyerno ngadto kanila hinungdan nga nakadesider kini sa paghangop sa gobyerno. Nanaad kini nga motabang ug mosuporta sa gobyerno sa mga kalihokan nga makahatag kaayohan kanilang mga lumad.
“Niabot mi, giatiman mi’g maayo, gipakaon mi. Kauban namo ang among pamilya ug giatiman mi maayo diha. So, dako kaayo ang among pasalamat sa atong gobyerno ug ilabi na sa kasundalohan,” saysay ni Datu Tungig.
Nipasalig si Col. Angcao, ang bag-ong komander sa 1003rdInfantry Brigade nga ilahang tabangan ang mga nisurender nga mapadali o kaha mapapas ang mga kaso kun ugaling masuta sa gipahigayong beripikasyon nga sila dunay kaso o warrant of arrest. Gusto ni Angcao nga matanggal ang mga kaso sa mga nisurender aron mopuyo kining malinawon sa komunidad.
“Actually, beni-verify naman natin initially sa pagsurender nila kung may mga kaso sila. We’re coordinating with the PNP kung may mga warrant of arrest. Hindi naman immediately mapawalang kaso sila. We will go on the usual process po kung may mga kaso sila, kung may warrant. Ganon pa rin ang usual process na ina-undertake natin but we are making necessary action on how we can help them,” sigon ni Col. Angcao.
Human sa maong press conference, mitunol si Kuya Gov sa kantidad nga P50,000.00 isip pasiunang financial assistance alang sa mga nisurender.
Writer: Nestor Mata, Jr.Photo: Kuya Gov. Edwin I. Jubahib
