Aron mamahimong luwas gikan sa mga infectious diseases ug makabaton og halapad nga luna sa mas komportable nga pag-asikaso sa mga pasyente, duha ka mga dagkong gambalay sa Carmen District Hospital ang giinagurahan niadtong Hunyo 13, 2023.

Gipangunahan ni Kuya Gov Edwin I. Jubahib ang seremonyas nga gitambongan nila Board Member Nicandro "Nickel" Suaybaguio Jr., BM Dr. Denise Marianne Lu, Provincial Administrator Engr. Josie Jean Rabanoz, Provincial Economic Enterprise Department Head Dennis Devilleres, Carmen Chief Hospital Dr. Ruchille Arrocena ug uban pa.

Ang duha ka mga proyekto mao ang two-storey Admin Annex Building balor P23,650,580.89 nga dunay gilapdon 330 sqm ug ang Provincial Temporary Treatment and Monitoring Facility (PTTMF) balor P9,870,941.72 sa 456 sqm nga luna. Kini nga kamugnaan nasubay sa KUYA GOB NG MASA development agenda diin gihatagan og bili sa administrasyong Jubahib ang health services.

Gikalipay ug gipasalamatan ni Dr. Arrocena ang katukoran sa duha ka mga building aron kini mas makahatag pa’g dakong serbisyong panglawas sa mga katawhan.

"The Davao del Norte Carmen Zone is indeed grateful to have this essential activity that is the blessing ceremony of the two building, the annex building and PTTMF by Department of Health," sulti ni Dr. Arrocena.

Gipasabot sa gobernador ang kamahinungdanon sa programang panglawas nga gipatuman ilalom sa iyang pamunoan. Gikanayon niini nga mas importante ang saktong pag-atiman ug pag-asikaso sa mga pasyente, ang pagpadayon sa Zero Billing program ug ang hugtanong pagpaningkamot sa pagsungkit og mga pondo ngadto sa nagkadaiyang national agency alang sa katumanan sa mga proyekto sama sa katukoran sa mga gambalay alang sa maong district hospital.

"So, priority natin ang kalusugan sa mga kaigsuonan dinhi sa probinsya sa Davao del Norte, kaya lagi kong sinasabi na sana ay maitutuloy natin ang programa natin sa zero billing para sa ating mga kababayan," matud ni Kuya Gov.

Writer/Photo: Lorna P. Tripoli