Nadismaya si Sen. Christopher Lawrence “Bong” Go sa kahimtang sa sugang dagitabnon sa probinsya, human niya mismong nasinatian ang kalit nga pagkapawng sa suplay sa kuryente samtang anaa siya sa tunga-tunga sa iyang pagpamulong atobangan sa liboan ka mga Dabaonon sa DavNor Training Center, DNSTC, Mankilam, Tagum City, niadtong Hunyo 13, 2023.
Nahimong bisita si Sen. Go sa probinsya atol sa unang anibersaryo sa pagdeklara sa Davao del Norte isip insurgency free province, dala ang ayuda alang sa mokabat 1,500 ka mga benepisyaryo sa Assistance to Individual in Crisis Situation (AICS) ug kapin 700 ka indibidwal alang sa Tulong Panghanapbuhay sa Ating Disadvantaged / Displaced Workers (TUPAD).
Sa mensahe sa senador, iyang gisaad sa katawhan sa DavNor nga iyang bantayan ang kahimtang sa sugang dagitabnon dinhi sa probinsya. Iyang gihagit ang mga kadagkoan sa Northern Davao Electric Cooperative, Inc. (NORDECO) nga ayohon ang ilang serbisyo sa katawhan.
Dugang ni Sen. Go, nga nagbayad sa saktong bayronon ang katawhan sa ilang konsumo sa kuryente, angayan lamang ihatag sa NORDECO ang tamang serbisyo kanila.
“Maoy problema dinhi, some parts of Davao ang brown out, mao nang nag-hearing mi sa senado. Pirme nako sila pangutan-on kung nganong sige’g brown out diri nga sa amo sa Davao wala may brown out, di ba? Porbida pud! Taronga pud inyong serbisyo! Gabayad man ang katawhan og tama, di ba? Nganong di man tagaan og maayong serbisyo palihog lang. Akong hangyo kaninyo, kung kinsa man tong provider dinhi sa kuryente, tagai ninyo’g tamang serbisyo ang katawhan kay nagbayad na sila og sakto,” matud ni Sen. Go.
Gipasalamatan ni Governor Edwin “Kuya Gov” Jubahib, si Sen. Go, gumikan sa walay pagduhaduha niining pagsanong sa imbitasyon sa probinsyal nga panggamhanan, nga mahimong keynote speaker sa gisaulog niining anibersaryo ug ang pagdala niini’g pondo alang sa mga Dabaonon nga naghilaid sa kalisud.
“Mapasalamaton ‘ta sa higayon nga gihatag sa atong Senador nga wa gyud siya nakalimot sa katawhan sa Tagum ug sa probinsya sa Davao del Norte. Kay sa tinuod lang, kanunay ang iyang assistance gikan sa DOLE-TUPAD Program ug AICS gikan sa DSWD. Tanang suporta, panahon nga naay calamity anaa dayon ang suporta sa atong pinalanggang senador, Senator Bong Go,” sumala ni Kuya Gov.
Atol sa maong kalihokan kauban ni Kuya Gov sa pag-abi-abi kang Sen. Go sila 1stDistrict Congressman Pantaleon Diaz Alvarez, Nanay Nicolasa Diaz Alvarez Foundation, Inc. (NNDAFI) Chairperson Jennifer Maliwanag, Tagum City Vice Mayor Allan Rellon ug Board Member Nicandro “Nickel” Suaybaguio, Jr.
Writer/Photos: Nestor Mata, Jr.
