Malipayong nagkahiusa ang mga opisyales ug katawhan sa Davao del Norte sa pagsaulog sa unang anibersaryo sa pagkadeklara sa probinsya isip “Insurgency-Free Province”.
Gipangunahan ni Senador Christopher Lawrence “Bong” Go ug Governor Edwin “Kuya Gov” Jubahib ang kasaulogan sa dakong kadaugan sa kalinaw, panaghiusa ug kalamboan sa probinsya.
Todo ang pahalipay ni Go sa probinsyal nga panggamhanan sa Davao del Norte, apil sa mga pwersa sa kasundalohan ug kapulisan sa kalampusan nga ilang naangkon.
Matud sa senador nga kini mag-abli’g mga oportunidad alang sa pagtubo sa ekonomiya, katilingbanong kalamboan ug malungtarong kalinaw. Kini kuno, dugang niya, nagpaila sa kaadlawan sa masanag nga kaugmaon diin ang katawhan mouswag, ang mga negosyo mahimong molambo ug ang sunod nga henerasyon magdako sa usa ka luwas nga komunidad.
“(This) opens new doors of opportunity for economic growth, social development and sustainable peace. It signifies the dawn of a brighter future where our people can thrive, our businesses can flourish and our children can grow up in a safe and secure environment,” sulti sa senador.
Nagpasalamat sab si Kuya Gov sa mga Dabaonon ug sa tabang sa mga government agencies, local officials, barangay functionaries, private sector, labi na sa mga kasundalohan ug kapulisan, ug uban pang mga stakeholders. Tungod sa nakab-ot nga kalinaw ug seguridad, ang kalamboan sa probinsya nahataga’g pagtagad.
“Angay lang nga magmalipayon kitang tanan tungod sa nahimo natong achievement nga ang Davao del Norte luwas na sa kahadlok, luwas na sa dakong problema sa kagubot nga maoy hinungdan nga ang development sa atong probinsya nahatagan og dakong pagtagad. Ug karon, ang atong ekonomiya sa probinsiya adunay taas nga pag-uswag,” ingon ni Kuya Gov.
Gibida ni Kuya Gov ang good governance, kon maayong panggobyerno nga giduso sa iyang administrasyon, nga nahimong susi aron mahuman ang problema sa insurhensiya sa Davao del Norte.
Apil sa iyang programang pangkalinaw ang kapin dosena ka mga bag-ong kalsada nga iyang giablihan sa kabukiran, apil ang dul-an 500 ka tribal housing projects, solar lighting ug electrification project sa unom ka sitio, 76 ka classrooms, upat ka tribal halls, 11 ka water system projects, usa ka community health station ug daghang livelihood projects sa lagyong komunidad sa mga IPs.
Gipatuman kini sa gobernador kauban ang mga ahensiya sa gobyerno ubos sa programang “Whole-of-Nation Approach” ni kanhi Presidente Rodrigo Duterte “in ending local communist armed conflict (ELCAC).
Sa maong okasyon, 40 ka mga surrenderees, kon Friends Rescued (FRs), ang gihatagan sa tag-P10,000 ubos sa localized Enhanced Comprehensive Local Integration Program (E-CLIP) sa probinsya.
Duna po’y 18 ka FRs ang gihatagan ug P4,330 ka TUPAD assistance, samtang nakadawat sab og school supplies ang 16 ka mga children in situation of armed conflict (CSAC).
Kauban sa maong okasyon sila 1st District Congressman Pantaleon Alvarez, Eastern Mindanao Command (EastMinCom) Commander LtGen. Greg Almerol, 10th Infantry Division (10ID) Commander Major General Jose Eriel Niembra, 1001st IB Commander Colonel Felix Ronnie Babac, 1003rd IB Commander Col. Marion Angcao, kanhi 10th ID Commander MGen. Reuben Basiao, DNPPO Provincial Director PCol. Antonio Alberio, ug uban pang opisyales.
Una pa ang programa sa selebrasyon, gipangunahan nila Go, kuyog si Kuya Gov, ang pagpang-apod-apod sa hinabang nga P3,000 ngadto sa 1,500 ka mga benepisaryo sa programang Assistance to Individuals in Crisis Situation (AICS).
Writer/Photos: Noel Baguio
