Gideklara isip overall champion ang DavNor Blue Marlins Swimming Team sa bag-ohay pa lamang gipahigayong 56thAraw ng Davao del Norte, Kadagayaan Festival 2023 Swimming Competition sa Davao del Norte Sports and Tourism Complex, Mankilam, Tagum City, niadtong Hunyo 24 hangtud 25, 2023.
Samtang nakuha sa Davao Red Sea Lions Swimming Team ang 1stRunner-up ug 2ndRunner-up ang Zamboanga United Swimming Team. Nakuha usab nila ang Biggest Team Delegation.
Hilabihan ang kalipay nga gibati ni Amil Cabatuan, ang Head Coach sa DavNor Blue Marlins, sanglit kini ang unang higayon nga ilang nakuha ang kampeonato. Sumala pa niya nga kasagaran sa kompetisyon nga ilang naapilan, pinakataas ang 1strunner-up nga team standing ang ilang naangkon.
“Walay kasudlan ang akong kalipay tungod kay in every past competition namo nga na-joinan, first place, second place, kana lang gyud ang among maabot. Pero karon, this is our first time nga mag-overall champion. Unya hometown pa gyud! Diria pa gyud sa amoa sa DavNor, atoa gyung place. Lipay gyud kaayo ko. Dako pud mi’g pasalamat ni Kuya Gov tungod kay naghatag gyud siya’g full support in celebration sa Kadagayaan pud nato 2023. Unya ang swimming competition iyaha gyung gipadayon. Sa mga player, more competition to come. Dili pa ‘ni mao, mas daghan pa’g challenges nga umabotay. Ingon ani ra gyud ang sports. Naay modaog, naay mapildi. Ang importante we learn and we improve,” sigon ni Cabatuan.
Dako sab ang kalipay nga gibati ni Airene Jade Andaya, magtutungha sa Davao del Norte Regional Sports Academy, gumikan kay siya ang gideklarang Most Valuable Player (MVP) bisan sa 15 anyos nga pangidaron. Gipasalamatan niya ang iyang coach ug ginikanan sa way puas nga suporta ngadto kaniya. Gidasig sab niya ang mga susama niyang mga swimmer nga dili dayon mawad-an sa paglaom kung ugaling man dili modaog sa kompetisyon. Hinuon maningkamot kini aron pag-abot sa panahon ilang maangkon ang kadaugan nga ilang gihandom.
“Thank you kaayo sa pagtudlo sa akoa coach kay bisan naa koy time nga mag-stop ko og swim kay dili gihapon siya moundang sa pagtudlo. Sa akong mama, salamat gyud kaayo sa pagsuporta sa akoa. Naghatag siya’g pang-allowance nako karon nga dula. Sa akong mga kauban sa swimming, dili lang mo mag-stop og swimming. ‘Pag dili mo makamedal dapat dili ninyo ma-feel nga down kaayo mo kay naa pay laing kompetisyon nga pwede pa mo modaog,” pagbutyag ni Andaya.
Gidayeg ni Rene Sta. Teresa, ang Head Coach sa Zamboanga United Swimming Team nga nakabase sa Zamboanga City, ang pagpadagan sa probinsyal nga panggamhanan sa maong kompetisyon ug ang kanindot sa pasilidad nga ilang gigamit. Nanghinaut kini nga buhaton sa PLGU ang susamang kompetisyon matag tuig ug nangandoy sab kini nga ilang makuha ang kampeonato sa umalabot nga panahon.
“First of all, salamat sa Ginoo nga naabot mi nga safe diri, especially mga bata. Secondly, ang mayor namo nag-support kaayo sa amoang team. Plus, among bossing sa sports si Ma’am Cecile Atilano, plus ang inyohang provincial government of Davao del Norte. Salamat. So far so good. Nindut ang mga facilities diri. So, hopefully next year naa na pud. Next year mas maganda na ‘yong performance namin kasi pagdating namin sa Zamboanga, ‘yong City Government naming pagbigay yan ng incentives sa mga bata. They will encourage ‘yong mga athlete natin. Hopefully next year makuha na namo ang champion,” matud ni Sta. Teresa.
Ang 56thAraw ng Davao del Norte, Kadagayaan Festival 2023 Swimming Competition, gipartisiparan sa mokabat 360 ka mga atleta gikan sa nagkadaiyang lugar sa Mindanao sama sa Zamboanga City, General Santos City, Kidapawan City, Butuan City, ug Bukidnon.
Writer/Photos: Nestor Mata, Jr.
