Natino na ang rota para sa ika-57 nga Araw ng Davao del Norte civic parade 2024 nga gikatakda karong Hulyo 1, adlaw'ng Lunes. Ang alay-lakad magsugod bandang alas-singko sa sayong kabuntagon, nga apilan sa mga trabahante sa kapitolyo, LGU's, publiko, ug mga pribadong institusyon.
Magsugod ang parada sa Tagum City Historical and Cultural Center ug mosubay sa Bonifacio St., Pioneer Avenue, dayon moliko sa Tagum City diversion road ug mosangko sa Davao del Norte Sports and Tourism Complex. Gihan-ay na usab ang mga alternatibong rota alang sa mga public utility vehicles (PUVs) nga maapektohan sa trapiko. Kini ang gibutyag ni Provincial Sports and Youth Development Officer Giovanni Gulanes sa ikaduhang coordination meeting nga gipahigayon sa VIP Clubhouse, DNSTC, Mankilam, Tagum City, niadtong Hunyo 25, 2024.
"Kami andam na ‘mi sa civic parade nga nagklaro na asang rota. Naklaro na ang mo-participate. Naklaro na pud ang logistical requirements. Naa lang gyud concern nga normal. Pero sama sa giingon ganiha, kung dili namo makaya sa among level, we would elevate that didto sa execom but more or less we are 95% ready,"sulti ni Gulanes.
Gipadayag usab niini nga tigum ang mga kaandaman gikan sa seguridad pinaagi sa deployment sa mga kapulisan, medical teams ug uban pang aspeto sa selebrasyon.
Ang panagtigum gidumalahan sa Provincial Sports, Youth and Development Office (PSYDO) ug gitambongan sa mga representante gikan sa PNP, AFP, Provincial Disaster Risk Reduction and Management Office (PDRRMO), DepEd DavNor, Provincial Social Welfare and Development Office, Provincial Tourism Office, Provincial Health Office, Department of Interior and Local Government Unit (DILG), Provincial Information Communication and Knowledge Management Office (PICKMO), Urgent AMRAC Inc. ug uban pang ahensiya sa panggamhanan.
Ang ika-57 nga Araw ng Davao del Norte ubos sa pagdumala ni Acting Governor De Carlo "Oyo" Uy, nakatutok sa serbisyo sa katawhan kon "People-Centered Governance". Ang pagpangandam sa probinsya anaa na sa 95 porsiento gikan sa parada ug mga paghan-ay sa mga programa.
"Ginaawhag ang tanan nga motambong. This is our way of celebrating, way of support sa kasaulogan nato. See you sa July 1. Mas maayo mga alas-4 assemble na ‘ta. At 5 o’clock maningkamot ta nga abante na ‘ta sa atong parada,"matud ni Gulanes.
Writer: Maria Lorna P. Tripoli
