Gipangunahan ni Acting Governor De Carlo “Oyo” L. Uy ang Mini Bagong Pilipinas Serbisyo Fair kalakip ang pagtunol sa Assistance to Individuals in Crisis Situation (AICS) payout sa mokabat 1000 ka mga benepisyaryo sa Sto. Niño, Talaingod, Davao del Norte, niadtong Hunyo 21.
“Padayon gihapon ang atong Bagong Pilipinas Serbisyo Fair. So, karong adlawa gidala nato dinhi sa Talaingod ang Bagong Pilipinas Serbisyo Fair kay tungod gusto nato na mas ipaduol ang serbisyo sa gobyerno ngadto sa katawhan,”matud ni Acting Gov Uy.
Paningkamotan ni Acting Governor Uy nga mahatagan og ayuda ang tanang katawhan sa lungsod sa Talaingod ug sa tibuok probinsya.
“Naningkamot gyud ta. In fact, kani atoang gibitbit karon good for 1,000 ni siya but niingon ko tuloy-tuloy gihapon ni siya kay gusto nato nga ang tanang Pilipino makadawat gyud og ayuda gikan sa atoang gobyerno,” ingon niya.
Gibatbat sa batan-ong acting gobernador ang pagbubo sa P40 million pondo nga gamiton sa pagpamalit semilya ug abono isip dugang tabang alang sa mga mag-uuma sa probinsya.
“Katong P40 million para to tabang sa atoang mag-uuma, gikan to sa probinsya nato na budget. So, karon naa ta’y gibitbit seeds and fertilizers. Padayon gihapon ang atong tabang sa ilaha,” dugang sa acting gobernador.
Mensahe ni Acting Governor Uy sa mga Dabaonon nga siya dili moundang sa pagserbisyo, padayon lang.
Ang mga benepisyaryo sa AICS midawat og tag-P2,000, samtang daghan sab ang ni-avail sa social and medical services sama sa libreng konsultasyong medikal, libreng tambal, libreng ibot sa ngipon, ug libreng tuli. Anaa sab libreng gupit, tambag-legal, serbisyo beterinaryo, distribution of farm inputs ug uban pa nga gidalit sa mga personahe sa Provincial Health Office nga gipangunahan ni Dr. Alfredo Lacerona ug sa Tagum City Health Office.
Niduyog sa maong kalihokan si Acting Vice Governor Flopone Royle “Popop” A. Catalan, Board Member Orly Amit, Board Member Emmanuel Pamisaran, ug si Samson Sanchez, ang representante ni Congressman Allan Dujali.
Writer: Nestor Mata, Jr.
