Usa ka gatos ug baynte-siete ka pamilya nga naigo sa ipo-ipo niadtong bulan sa Hulyo sa siyudad sa Tagum ang midawat sa Emergency Shelter Assistance gikan kang Governor Edwin “Kuya Gov” Jubahib, sa VIP Clubhouse, DNSTC, Mankilam, Tagum City, niadtong Septyembre 26, 2023.
Sumala ni Provincial Social Welfare and Development Officer Rosalinda Rapista nga 19 ka panimalay ang makonsiderang hingpit nga naguba samtang 108 ka panimalay ang nakahiagom og parsyal nga pagkadaut. Dugang niya, modawat og P10,000 matag pamilya ang adunay totally damaged nga balay samtang P5,000 sab ang dawaton sa partially damaged ang panimalay.
“So, kaning gamay nga tabang ni Kuya Gov nga inyong madawat karon cash ni siya. Hinaut nga kini, mapalit gyud ninyo’g mga sin, kahoy ba ‘ron nga idapat sa inyong mga balay,” sigon ni Rapista.
Sa mensahe ni Kuya Gov pinaagi sa iyang representanteng si Executive Assistant Arnel Montero, nagpaabot kini sa iyang dakong pagpasalamat nga walay mga kinabuhing nakalas sa pag-igo sa ipo-ipo sa Tagumpay Village ug uban pang bahin sa Tagum City. Iyang gipahimangnoan ug gihangyo ang mga benipisyaryo nga gamiton sa sakto ang kwartang ilang nadawat.
“In behalf kang Kuya Gov, unta ang kining tabang nga inyong madawat karon magamit ninyo sa sakto ninyo nga panginahanglan. Gamay man lang ni siya nga amount mga igsoon. Dili ni mo-suffice sa inyong gihimo nga panimalay. But then, ang gusto lang ni Kuya Gov nga mahatagan mo’g kinasingkasing nga tabang gikan kang Kuya Gov Edwin I. Jubahib,” ingon ni Montero.
Dako ang pasalamat ngadto sa Probinsyal nga Panggamhanan ug kang Kuya Gov si Lourdes Dayap, residente sa Prk. Abaca, Mankilam, gumikan sa paghikotar kanila ug way puas nga paghatag og hinabang nga ilang magamit aron sila makabangon human naigo sa maong kalamidad.
“Mga Tagumenyos, karong adlawa magpasalamat gyud ta sa Ginoo, kay ngano? Siya gyu’y naghatag aning atong mga kaayohan karon. Ug ikaduha, atong pasalamatan si Kuya Gov Edwin Jubahib, sa iyahang kinasingkasing nga pagtabang sa ato. Kay kung wala siya, wala man gyud ta’y ipaatop sa atong balay karon,” pagpadayag ni Dayap.
Kahinumdoman, hapon niadtong Hulyo 25, 2023, nakurat ang mga residente sa Tagumpay Village ug uban pang dapit dinhi sa siyudad sa Tagum sa dihang mibutho ang makusog nga ipo-ipo ug mikuso-kuso sa ilang mga kabalayan, miresulta sa pagkadaut sa ilang mga balay.
Writer/Photo: Nestor Mata, Jr.
