116 ka pamilya ang nakabenepisyo sa bag-ong batch sa Balik Probinsya, Bagong Pag-asa (BP2) Program sa gipahigayong pay-out sa VIP Clubhouse, DNSTC, Mankilam, Tagum City, niadtong Oktubre 9, 2023.
Sumala ni Provincial Social Welfare and Development Officer Rosalinda Rapista nga kini na ang ikaduhang batch niining tuiga nga hatagan sa mga nagkadaiyang packages sa BP2 Program. Dugang ni Rapista, gawas sa mga packages nga ilang gihatag, nitunol sab ang Probinsyal nga Panggamhanan ubos sa liderato ni Governor Edwin “Kuya Gov” Jubahib og mga food packs.
“Naa ta’y 116 ka families throughout the province nga tagaan na pud og mga packages. Naa ta’y ginatawag nga transitory livelihood packages nga makadawat og P50,000, naa pu’y transitory shelter assistance nga P50,000, ug kanang gitawag nila’g transitory family packages. So, karong hapona duol-duol naa gyud makadawat ani tag-P120,000. So, diri sa probinsya pasalamat ta kang Kuya Gov kay very supportive siya. Naa pud ta’y gipanghatag nga food packs sa atong mga beneficiaries, nga naa sila’y kwartang madawat pag-uli, naa pud sila’y malung-ag dayon,” sulti ni Rapista.
Matud ni Executive AssistantReynante Monares nga padayon si Kuya Gov nga nagalantaw alang sa kaayohan ug kanunay andam nga motabang sa mga katawhan dinhi sa Davao del Norte.
“Sa pagkakaron, makita nato nga anaa pu’y pamaagi ang atong halangdong Gobernador para maalagaran ang panginahanglan sa katawhan. Isa niini kaning Balik Probinsya nga programa nga ginalantaw nga dako gyud kaayong mahimong ikatabang diha sa matag recipient niini,” ingon ni Monares.
Gipasalamatan ni Regional Program Coordinator sa DSWD XI Lanie Cudino ang Probinsyal nga Panggamhanan gumikan sa makanunayong suporta ngadto sa mga benepisyaryo sa BP2 Program. Giawhag sab niya ang mga benepisyaryo nga gamiton sa hustong gamitan ang kwarta nga ilang nadawat.
“So, dako kaayo ang atong pasalamat sa Provincial Local Government Unit kay always gyud naa permanente ang ilang support para sa inyoha. Dili para sa amoa ha, para sa inyoha. Mao nang atoang dakong pasalamatan. Wala gyud ingon nga nagmahay nga naa dinhi, halos tanan nga naka-avail sa BP2 Program,” matud ni Cudino.
Nagpaabot sab sa iyang dakong pasalamat kang Kuya Gov si Lorna Francisco usa sa mga benipisyaryo sa BP2 Program gumikan sa dakong tabang niini nga nahatag kanila. Gisaysay ni “Dayang” ang iyang mga kasinatian samtang nawad-an sa panginabuhian ang ilang pamilya sa dihang nibutho ang pandemyang covid-19.
“Nanguli mi dinhi kay naapektohan mi sa pandemic. Naguba tanan ang among panginabuhi. Didto mi nipuyo sa ilalom sa tulay sulod sa pila ka tuig. Namasura mi. Ang akong isa ka anak, didto nako gipanganak sa ilawom sa tulay. Nangarkila man mi, gipahawa man mi sa among giarkilahan. Ipabalay nako, kay ang among balay karon tarpaulin ra ang bongbong, igo ra mapalidpalid sa hangin. Ikaduha, ang livelihood. Ako gyud nang paningkamotan nga molampos gyud nang panginabuhi nga gihatag sa gobyerno sa amoa. Ug salamat kaayo kang Gov nga gitabangan mi ing-ani. Kung wala’y ing-ani, wala pud mi karon dinhi,” saysay ni Francisco.
Ang Balik Probinsya, Bagong Pag-asa (BP2) Program gisugdan panahon sa administrasyon ni kanhing Presidente Rodrigo Duterte aron mahatagan og kahigayonan ang mga katawhan nga naapektohan sa pandemya nga anaa sa kaulohan nga makauli ug manginabuhi sa ilang tagsa-tagsa ka probinsya.
Writer/Photos: Nestor Mata, Jr.
