Malampuson ang gipahigayong duha ka adlawng tigi sa paugnat sa kusog atol sa 2nd Regional Registry of Deeds (ROD) Sportsfest 2023 sa Davao del Norte Sports and Tourism Complex (DNSTC), Mankilam, Tagum City, niadtong Oktubre 14-15, 2023.
Ang mga sports event nga ilang gidula mao ang basketball, volleyball, badminton, swimming, athletics, e-games, kalakip sab ang larong pinoy sama sa tug of war ug sack race. Highlights sa kalihokan ang cheerdance competition.
Gipahimangnoan ni ROD Davao del Norte Head Atty. Jhon Paul Devilleres ang mga partisipante sa mga dula nga dili lang maninuod kondili himuon kini nga lingaw-lingaw lamang aron walay masakitan o mabalian sa aktwal nga dula.
Nagpadayag sa iyang dakong kalipay si ROD Regional Director Atty. Hanniyah P. Sevilla sa nakitang maayong performance sa iyang mga sakop nga nipartisapar sa nagkadaiyang sports event. Matud niya nga gihimo ang maong padula aron pagpromotar sa camaraderie ug health and wellness sa iyang mga ginsakopan.
“Namugna ni nga event, kay para ma-promote ang camaraderie among the region sa tibuok registries ug ang health and wellness pud sa mga empleyado. Actually, bibo gyud kaayo. Wala mi kabalo nga ing-ana diay kadaghan nga talent ang naa sa amoang mga registries. Hopefully, we can make this a regular event kay grabe from Mati to Digos nanganhi gyud sila dinhi sa Davao del Norte and they showcase a lot of talent. So, we are very happy about that,” sumala ni Atty. Sevilla.
Gidayeg ni Atty. Sevilla ang Probinsyal nga Panggamhanan sa Davao del Norte gumikan sa world class nga mga pasilidad nga ilang nagamit sa ilang padula. Nagpaabot sab kini sa iyang dakong pasalamat kang Governor Edwin “Kuya Gov” Jubahib gumikan sa makanunayong suporta nga gihatag sa ilang ahensya.
“Actually, dako kaayo mi og pasalamat sa Provincial Government sa Davao del Norte kay ilaha gyung gitagaan og support ang amoang event, ilaha ming gipagamit. Kay Gov Jubahib, kay Kuya Gov, salamat kaayo kay world class kaayo ang inyohang facility. Impress kaayo mi sa amoang region because we’re able to play well, walay na-injured. Gihatagan pud mi sa Provincial Government og medics and everything. We were really taken care off and the facility is really at far with the world class and Olympic facilities,” saysay ni Atty. Sevilla.
Gipasalamatan sab ni Atty. Sevilla ang iyang mga ginsakopan gumikan sa kooperasyon niini ug nahimong kalamposan sa maong padula. Giawhag niya ang iyang mga sakop nga himoong prayoridad ang Health and Wellness sa ilang kaugalingon.
Gideklarang overall champion ang ROD Davao del Norte, samtang champion usab sa cheerdance competition ang ROD Davao City.
Writer/Photos: Nestor Mata, Jr.
