Nagsalo ang mga information officers sa tanang lokalidad sa Davao del Norte, mga lehitimong private media practitioners, mga nasudnong ahensiya sama sa Philippine Statistics Authority (PSA), Bureau of Internal Revenue (BIR), Department of Agriculture, Agricultural Training Institute (ATI) Davao Region, Department of Transportation-Land Transportation Office Regional Office XI, ug Department of Information and Communication Technology (DICT) sa pinakaunang Information Officers and Media Summit (IOMS) sa probinsya atol sa Press Freedom Month subay sa Provincial Ordinance No. 2008-002.
Gisugdan kini sa motorcade sa buntag ug gilayon programa nga gihan-ay sa Provincial Information, Communications, and Knowledge Management Office katambayayong ang Philippine Information Agency (PIA) ug Information Officers Network (ION) sa Robinsons Place Tagum, niadtong Oktubre 13, 2023.
Gipasabot ni ION President Michael Angelo A. Resueño nga tinguha sa maong organisasyon nga makig-alayon sa mga mamamahayag pribado man o gobyerno alang sa malungtarong panaghiusa.
“That Information Officers and Media Summit is a brain child of the Information Officers Network Association Incorporated to mark the lasting alliance between the government to the Information Officers and the media. They are our partners and their services are part of nation building," sulti ni Resueño.
Gipabibo ang selebrasyon pinaagi sa Media Got Talent Competition nga gisalmotan sa nagkadaiyang mga information officers ug media practitioners diin dagkong papremyong salapi ang gidalit sama sa P6,000 sa first prize winner ug P2,000 consolation prize. Nakabitbit pud og nagkadaiyang items ang nabunotan sa pa-raffle, ug naka-avail ang mga nanambong sa mga serbisyo sama sa pagkuha sa temporaryong National ID sa PSA.
Gisaksihan sa mga dagkong opisyal ang programa sama sa representante ni Governor Edwin "Kuya Gov" Jubahib, representante ni Sec. Maria Belen Sunga-Acosta sa Mindanao Development Authority, Braulio E. Dujali Mayor Atty. Leah Marie Moral, Board Member Francisco Remitar, ang Chairman sa Committee on Information and Media Affairs sa Sangguniang Panlalawigan sa Davao del Norte, mga kapulisan sa pagpanguna nila PNP Provincial Director PCol Alexander R. Serrano Jr., Police Major Anjanette P. Tirador, mga vloggers ug uban pa.
"Ako nasayod nga dili lalim ang trabaho sa usa ka magsisibya. That is why I am proud that in Davao del Norte Press Freedom is alive and practiced by many. In fact, under Kuya Gov. Jubahib Administration, atong gipakusgan ang pagpadangat sa impormasyon nga dapat masayran sa tanan aron mapalambo sa katawhan ang ilang mga kinabuhi," ingon ni Dr. Suaybaguio.
Sa maong okasyon gipaambit sa mga eksperto ang mga katakos ug mga bag-ong mga pamaagi sa pakiglambigit sa digitalization nga mao ang social media, mga pagpahinumdom sa mga kaakohan isip maoy tinubdan sa mga impormasyon ug uban pang mga maayong inputs alang sa sakto, responsable ug tinuod nga paghatud sa mga balita ngadto sa katawhan.
Writer/Photos: Maria Lorna P. Tripoli
