Onse ka mga lokalidad sa probinsya sa Davao del Norte pagahitaboan og public hearing kalabot sa "Proposed Revision of Local Taxes, Fees and Charges" ug "Implementation of Electronic Transactions". Human mapatigayon ang public hearing sa tanang LGUs, kini pagahimoan og ordinansa sa probinsya pinaagi sa Committe on Ways and Means sa Sangguniang Panlalawigan nga gipangamhan ni Senior Board Member Flopone Royle Catalan.
Unang gihimo ang public hearing sa lungsod sa Asuncion ug New Corella niadtong Oktubre 10, 2023, ug gilayon gisundan sa LGU Kapalong ug San Isidro niadtong Oktubre 11. Nagpadayon kini sa mga lungsod sa Talaingod ug Sto. Tomas, niadtong petsa 17, ug Carmen ug Braulio E. Dujali, petsa 18, petsa 19 sa buntag sa Tagum City Cultural Trade Center ug Multi-Purpose Tourism Cultural and Sports Center sa Panabo City, ug matapos sa Island Garden City of Samal, petsa 20 niining kasamtangang bulan.
Gipasabot ni Senior Board Member Catalan nga adunay mga local taxes, fees ug charges nga gikatakdang usbawan subay sa mandato sa balaud nga nakatakda matag lima ka tuig apan minimal lamang nga usbaw ug makatarunganon. Samtang, gipasabot ni BM Catalan nga dili tanang balayronon gipausbawan. Dugang niini nga ang probinsya andam na alang sa implementasyon sa electronic transactions.
"Duha ang atong ordinansa nga gi-conduct-kan og Public Hearing. Una, is ang revision of local fees, ug ang ikaduha, is ang ordinansa nga ato pong gi-propose is kining atong Implementation of Electronic Payment. Well, we are ready to implement because the system is already here. Naa na ang Sistema. Naa na ang software. Naa na sa website. Magamit na nato na siya pero ang gipaabot na lang is ang pag-aproba sa ordinansa para nga ma-implement sa atong probinsya," sumala ni BM Catalan.
Samtang, gawas sa katawhan, mga department heads sa nagkadaiyang buhatan sa Provincial Capitol ang nanguna sa maong pagdungog sama sa Provincial Treasurer’s Office, Provincial Assessor’s Office, Provincial Engineer’s Office, Provincial Sports and Youth Development Office ug uban pa.
Ekipo, supplies, DavNor gym, oval ug uban pa ang hinungdan sa pag-usbawan sa buluhisan. Gikabutyag nga ang makolektang buhis gikan niini mahimong dugang pondo sa probinsya alang sa hiniusang pagsuporta sa mga inklusibong mga programa ug proyekto ilalom sa liderato ni Governor Edwin "Kuya Gov" Jubahib.
"Nahisubay kini sa direksyon sa atong Probinsyal nga Panggamhanan sa Davao del Norte pinangulohan sa atong Gobernador Edwin I. Jubahib uban sa mga department heads ug sa atong Bise Gobernador Oyo Uy ug kaubanang board members. Hiniusa kini nga pagpaningkamot," dugang ni BM Catalan.
Writer/Photo: Maria Lorna P. Tripoli
