Nasungkit sa Tagum City Ferocity Dance group ang P15,000, human nadeklarang kampiyon sa Hip-Hop Youth Competition sa nagpadayong Provincial Youth Congress 2023, sa DavNor gym, DNSTC, Mankilam, Tagum City niadtong Oktubre 16.
Unom ka mga grupo sa mga kabatan-onan ang nagtigi sa sayaw gikan sa mga nagkadaiyang lokalidad sa probinsya. Kini ang pinakaunang hip-hop contest nga gimugna sa Provincial Sports and Youth Development Office (PSYDO) human sa livelihood training nga natigayon ning kasamtangang tuig subay sa aktibidad sa youth sector.
Ikaduhang pwesto ang garbo sa Braulio E. Dujali, nga "D Cru Extreme" nga nakadawat sa P10,000 reward. Mokabat usab og P7,500 ang nadaog sa Sto. Tomas, "Xtreme Vibes” sa ikatulong ang-ang. Samtang, P5,000 alang sa "Samal Alliance" nga maoy 4th Placer. Walay niuli nga dismayado sanglit ang tanang misalmot nga wala palari adunay giuli nga P2,500 consolation prize sama sa Sto. Tomas "Bro's N Vibe Jr.” ug New Corella “Tanglaw Mananayaw”.
Nagpakitang-gilas usab ang Davao Winchester College, Inc. Cheerdance Troupe alang sa usa ka intermission number.
Ang maong youth congress sa probinsya naglihok sa temang "Green Skills for Youth: Towards a Sustainable World". Ubos kini sa pagpasiugda sa Probinsyal nga Panggamhanan sa Davao del Norte pinaagi sa PSYDO ilalom sa pagdumala ni PG-Department Head Giovanni I. Gulanes.
"So, ang mga batan-on gi-encourage nato nga molambigit sa sayaw because that's what makes you healthy. The other is kabalo naman ta without explaining further – ang paglambigit nato sa usa ka mahinungdanong butang sama sa dancing would bear us away from illegal substance," ingon ni Gulanes.
Samtang, gikanayon sa representante ni Governor Edwin "Kuya Gov" Jubahib nga ang gobernador sa kanunay hugtanong nagalantaw sa kaayohan sa mga kabatan-onan.
"Ang suporta sa atong halangdong gobernador kanunay gyud nga anaa dinha tungod ug alang sa iyang paglantaw nga ang atong panggamhanan puhon nakasalalay diha sa atong mga kabatan-onan," sulti ni Renante Morales, ang tigpamaba ni Governor Jubahib sa maong patigayon.
Writer/Photo: Maria Lorna Tripoli
