89 ka pamilya nga biktima sa managlahing kalamidad nga miigo sa probinsya ang gitunolan og ayuda sa Probinsyal nga Panggamhanan ubos sa pagdumala ni Governor Edwin “Kuya Gov” Jubahib atol sa turnover ceremony sa Emergency Shelter Assistance sa VIP Clubhouse, Mankilam, Tagum City.
Gipasabot ni Provincial Social Welfare and Development Officer Rosalinda Rapista, ang mga benepisyaryo nga makadawat og tag-P10,000 ang totally damaged ang panimalay, samtang, P5,000 sab ang madawat sa partially damaged ang balay. Giisplikar sab ni Rapista ang hinungdan sa pipila ka adlaw nga pagkadelatar sa maong ayuda gumikan sa pagsunod sa mga rekisitos sa gipangayo sa gobyerno.
“Akong iisplikar sa inyoha kung nganong nadelatar gamay, tungod kay duna tay proseso sa gobyerno nga atong ginasunod. Duna gyuy papeles tanan ni sa barangay, report sa atoang Disaster sa City o asa man nga lugar, ug kanang report nga gikan sa Fire og kamo nasunogan,” sumala ni Rapista.
Sa mensahe ni Governor Edwin “Kuya Gov” Jubahib pinaagi sa iyang Executive Assistant Ptr. Jerry R. Marimon, nga sa kanunay naningkamot si Kuya Gov nga makahatag og ayuda sa mga katawhan nga naigo sa nagkadaiyang kalamidad. Padayon sab ang gobernador sa pagpangita og dugang pondo aron magamit sa pag-implementar sa mga nagkadaiyang proyekto ug programa.
“Gikan sa opisina ni Kuya Gov, nagpabilin ang pagtabang sa mga pag-ampo, hinabang, bisan pa sa mga salapianong bahin nga inyong madawat karon,” matud ni Marimon.
Nagpaabot sa iyang dakong pasalamat kang Kuya Gov si Reynante Cabatingan nga gikan sa siyudad sa Panabo gumikan sa cash assistance nga gitunol kanila.
“Pasalamat ko’g dako sa atoang halangdon nga gobernador nga si Gobernador “Kuya Gov” Edwin Jubahib, nga siya gyud nag-andam og dakong tabang alang kanamo nga nabiktima sa mga kalamidad,” ingon ni Cabatingan.
Ang mga nahisgutang biktima naggikan sa siyudad sa Panabo nga dunay 48 ka mga benepisyaryo, 37 sab ka mga benepisyaryo sa siyudad sa Tagum, duha sa lungsod sa Talaingod ug tag-usa sa lungsod sa Carmen ug New Corella.
Writer/Photo: Nestor Mata, Jr.
