“Ang mensahe sa atong halangdong governor, usa sa pinaka importante nga ingredient aron nga mo-successful ang programa sa atong BEST PEOPLE, pinaagi sa paglig-on sa matag pamilya. Kay kawang ang programa sa gobyerno kung ang pamilya huyang ug nagka problema,” matod ni Probinsyal Administrador Samson Sanchez samtang naghatod sa mensahe ni Gobernador Anthony del Rosario atol sa Kasalan ng Bayan didto sa Carmen, Davao del Norte, Byernes, Hunyo 15.
Tradisyon na sa paglibot sa BEST PEOPLE Public Service Caravan ni Gob AGR nga sa kataposang adlaw himoon ang Kasalan ng Bayan.
“Sa mga pagpaambit sa milabay’ng Kasalan ng Bayan, masumada ang mensahe sa atong halangdong governor ug angay natong mahinumdoman ang pulong nga “SHARP.” Sensitivity sa matag usa. . Hopeful ang panagtiayon. . Acceptance sa kahuyang ug kalig-on sa matag usa. . Respect. . ug Prayerful ang managtiayon. . Kay kung wala ang Ginoo nga third party, kung lain ang third party, bungkag gyod ang kaminyoon. . Mga kaigsoonan kana mao ang inspiring words sa atong halangdong governor diha kaninyo, hinaut unta nga kanunay ninyong hinumduman. . Rekindle the love pinaagi sa pulong nga SHARP,” pagpasiugda ni PA Sanchez.
Ang officiating minister Carmen Mayor Virginia Perandos gusto sab maneguro nga tinud-anay na gyod ang desisyon sa mga kaslonon.
“Samtang wa pa ta magsugod mangutana ko ninyo sa kinasingkasing gayod kung tinud-anay ba gyod ang inyong pagpaso dinhi aron magpakasal. Pataas ang kamot kung nagduhaduha ug hinayhinay ug exit,” pangutana sa mayora nga walay bisan usa ang mipataas o bisan usa gikan sa sobra usa ka libo ka tawo nga nanan-aw nga mitindog aron mobabag.
“Balikon nako nga kini kontrata paga pirmahan. This is kadenang-papel. . Kung mahuman na ta’g kasal ron, kanang inyong tapad mao na gyod na ang inyong bana, mao na gyod na inyong asawa. Di ra ba ni parehas sa magpalit ta sa tindahan nga kung depektado atong iuli. Marriage is no return, no exchange policy,” pasiugda ni Mayor Virgie sa kasagrado sa kaminyoon.
Uban sa iyang napangasawa, gipahimuslan ni Jerry de Ocampo nga usa ka Muslim ang libreng sibil Kasalan ng Bayan.
“Para mahimsog ang among panag-uban. . Maghinay-hinay ug pondar para maayo ang kinabuhi namong duha,” malaumon nga pahayag ni Jerry, 20 anyos nga giuyonan ni Mary Jane nga 21 anyos sab. Ang bag-ong magtiayon nagpuyo sa Tibulao, Carmen ug nagplano nga magpakasal sab sumala sa ilang tinuohan kung makatigom na.
Sama sa nangaging Kasalan, ang tanang 174 ka magtiayon pulos nakadawat ug mga regalo gikan kang Gobernador Anthony del Rosario ug sa mga ninong ug ninang nga mga department heads sa DavNor Kapitolyo.
Hangtod ning pagsulat, ang Kasalan ng Bayan sa Carmen mao ang pinakadaghan kung itandi sa miaging upat ka Kasalan nga dala sa BEST PEOPLE Public Service Caravan.
