Kapin 143 ka mga proyekto nga mukabat ngadto sa P468.2 million ang nahuman ni Kuya Gob Edwin I. Jubahib sulod sa unang tuig nga iyang paglingkod.

“Kini ang mahinungdanong bunga sa atong paningkamot sa kabag-ohan, alang sa tinuod nga kalamboan sa Davao del Norte,” sulti sa gobernador, atul sa iyang Ulat sa Probinsya kaganinang buntag.

Ang okasyon ‘highlight’ sa ika-53 nga Araw ng Davao del Norte karong adlawa.

Lakip sa nahuman nga mga imprastraktura ang pagsimento sa 10.359 ka kilometro nga dalan og pagmintinar sa 576.49 kilometros nga dalan sa probinsiya, 36 ka public buildings og facilities, 4 electrification projects, 6 Potable water systems, 8 drainage canals ug flood control projects, ug, uban pa.

Samtang padayon pa ang laing 49 ka mga proyekto nga nagkantidad og P553.6 million.

Gisulti'g balik sa gobernador ang iyang tuyo nga pagtiwas sa tanan ang bilyones nga kantidad sa mga proyekto nga gibiyaan sa miaging administrasyon. Apil niini ang upat ka mga proyekto nga mikantidad og P171 million ang iyang giinagurahan sa miaging semana.

“Atong ginapaningkamutan nga walay piso nga masayang sa kwarta sa katawhan,” ingon sa gobernador.

Apil sa nahuman ni Kuya Gob ang pagpadako sa 62,762 linear meters nga mga kanal, nga mokantidad sa P15 milion, ubos sa programang Oplan Canal.

Gilusad sab ni Kuya Gob ang programang DavNor KAAGAPAY (Kawsa sa Agrikultura ug Panginabuhian sa Barangay), aron masiguro ang seguridad sa pagkaon ug matubag ang nag-unang panginahanglanon sa mga katawhan taliwala sa krisis sa COVID-19.

Pagsugod sa programa, mi-apod-apod ang probinsya sa 29,000 seedlings sa kape, 9,900 ka mga semilya sa mahogany, 15,000 ka mga semilya sa Falcata, 30,000 ka mga semilya sa cardava, 1,000 ka mga seedlings sa Lubi, 10 ka sako nga semilya sa Camote, 253 ka mga pakete sa vegetable seeds ug 23,000 ka mga seedlings sa abaca.

Sa tanan-tanan, nakahatag ang probinsya og 113,716 ka sakong bugas nga mikantidad og P252,424,200, ug 29,728 boxes sa tinapa nga mobalor og P42,123,790, alang sa 371,000 ka mga pamilya, gawas sa mga barangay functionaries, frontliners, security personnel, religious sector, ug uban pa.

Dunay 10,946 ka mga pasyente ang nakapahimulos sa libre nga pagpa-ospital, ubos sa Zero-Billing program sa probinsya.

Kapin libo sab ka mga kanhi sakop sa NPA ang misurrender, diin duna na’y P5.7 million nga financial assistance ang nahatag sa 427 ka mga kanhi rebelde.

Apil sa nadawat nga pasidungog sa probinsiya ang upat ka outstanding performance awards tungud kay milampas kini sa revenue collection targets; Most Business-Friendly Local Government Unit – Province Level 1; ug isip Most Competitive Province sa Rehiyon 11 ug sa Tibuok Mindanao, ug isip ika-6th Most Competitive Province sa tibuok Pilipinas.

Mitambong sa SOPA ni Kuya Gob sila 1st District Congressman Pantaleon Alvarez, 2nd District Congressman Alan Dujali, Vice Governor Rey Uy ug mga miyembro sa Sangguniang Panlalawigan, LtGen. Jose C. Faustino Jr., mga mayores, mga department head ug uban pang mga opisyales.

Kay limitado ang makatambong sigun sa social distancing protocol, nagtan-aw na lang sa live streaming ang ubang mga local officials ug kawani sa nagkadaiyang mga opisina sa mga LGU sa probinsiya.

Una ang programa, gibuksan sa gobernador ang bag-ong One DavNor, One Team Marker atubangan sa Kapitolyo.

 

 

 

 

 

 

 

DavNor News