SA DILI MADUGAY ipatuman sa tibuok Davao del Norte ang “No QR Code, No Entry; No QR Code, No Transaction” human mahatagan ug eksaktong pahibalo ang publiko.

“Lisod kaayo ang pag-contact tracing. . Mao ning mi-come-up ta ug QR code nga dapat ma-100% ang atong implementation. Kay thru QR code kung fully gi-disseminate na nato ni nga tanan ma-member sa atong contact tracing sa QR, maghatag na ko’g Executive Order nga “No QR Code, No Transaction, No Entry” ug i-adopt na sa tanang LGUs kay maoy among nasabotan. Kung mahimo karon nga week ma-paspasan na nato ni,” pahayag ni Kuya Gob nga nangunay gayod sa pagbisita sa tanang LGUs kauban ang team aron pagpasabot sa pagka-dinalian ug pagka-kinahanglanon gayod sa mga QR codes.

Gilaoman nga ma-implementar kini sa unang semana sa Agosto dihang mapagawas na ang Executive Order ni Gobernador (Kuya Gob) Edwin I. Jubahib human usab nga marehistro na sa tanang LGUs ang ilang mga residente nga nahatagan ug Quick Response (QR) codes nga gikinahanglan alang sa Davao del Norte COVID-19 Contact Tracing System.

“Tungod sa atong pandemic gikinahanglan gyod nga mag-extra ordinary works ta. Kabalo ko nga gikapoy namo sukad lockdown, mora’g gibati namo’g puol. Sa sugod abtik, pagmagka-dugay magkaluya, kumpyansa na. Hinumduman nato. Adtong first wave atong positive is napulo lang. Tungod sa inyong paningkamot ug estriktong implementasyon, tibuok probinsya walay local transmission. Karon nag-MGCQ aduna hinuon ta’y 54 ka positive. Sa napulo, mora’g kurat-kuratan ta, di na ta matulog kay sige na lang ta’g bantay. . Karon nga 54, smile-smile na man hinuon,” matod ni Kuya Gob ngadto sa tanang 20 barangay kapitanes sa Asuncion nga nagpasidaan nga usa lang ang patay ilawom sa ECQ samtang tulo ang panahon sa MGCQ.

Bisan kung walay local transmission, midaghan ang kaso sa COVID-19 positive sa DavNor tungod sa Balik Probinsya program alang sa Locally Stranded Individuals (LSI) ug mga OFWs.

“Tungod sa MGCQ magtabok-tabok, magkuros-kuros na ang tao. . magkuros-kuros na pod ang COVID-19. Kay dili na nato makontrol ang pagpasulod sa tao, lisod na kaayo. Mao nang namugna ang atong himoonon nga Davao del Norte COVID-19 Contact Tracing System. . . Nagsaka ang atong kaso. . Hangtod karon wala gihapo’y tambal, walay vaccine. Mao nga i-strengthened nato ang atong surveillance, ang atong contact tracing pinaagi ining QR Code. . Kay engkaso. . dali ma-trace, dali matawagan,” dugang pasabot ni Dr. Alfredo Lacerona, ang Incident Commander sa DavNor COVID-19 Task Force.

Ang ngalan, gender, adres, birthdate, trabaho ug contact number mao lang ang pangayoon aron mabutang diha sa QR code ug alang sa mga “bisita” sa DavNor hatagan sab sila ug ‘Visitors QR Codes’.

“Usa kini siya ka system nga modagan sa cellphone naay internet o wala; modagan ang atong system, sa laptop. Ang tawo mohatag sa iyang detalye. . . isulod sa system,” matod ni PHRMO Edwin Palero nga mao ang manager sa “contact tracing system” uban ang bug-os pasalig nga ila gyod gisunod ang Data Privacy Law.

Aron di maglisod gihatagan ni Kuya Gob ug cellphone ang tanang 223 ka mga barangay aron magamit sa pag-scan sa QR codes.

 

 

 

DavNor News