Desidido si Kuya Gov. Edwin I. Jubahib nga motunol ug tabang ngadto sa Lungsod sa Talaingod ilabi na sa mga miyembro sa tribong Ata-Manobo. Kini iyang gipamatud-an pinaagi sa pag apruba sa lima ka adlaw nga pagbansay alang sa Paghabi ug Lanot sa Abaca aron mamahimong Tela (Abaca Fiber Weaving cum Abaca Fabric Production) niadtong Hulyo 13-17, 2020 sa Tribal Compound, JBL, Barangay Sto. Nino, Talaingod.

Ang tradisyonal nga paghabi sa tela gilangkuban sa 17 ka mga miyembro sa tribo kinsa mapasalamaton sa ilahang bag-o nga nakat -unan nga teknolohiya nga gitudlo nila Mr. Jeofrey S. Ganade ug Ms. Angelita A. Dalisay.

Gisaysay ni Engr. Josie Jean R. Rabanoz, Provincial Administrator, atol sa gipatigayon nga Completion Ceremony, ang maong kalihukan nagtumong sa pagtabang sa ilang ekonomikanhong panginahanglan, sanglit adunay dakong demand sa maong produkto. Mamahimo nila kining mapanginabuhian hilabina karong panahon sa COVID-19 pandemya. Iya usab nga giawhag ang tanan sa pakiglambigit aron molungtad ang maong proyekto ug mamahimo kini nga usa sa mga bag-ong tourist attractions sa Lungsod sa Talaingod.

Mitambong usab sa maong seremonya sila Engr.Maria Hazel C. Zafra (Asst. Provincial Administrator-Operations) ug Ms. Gemma Montegrande (OIC Division Head, SPPD) aron mosaksi sa maong panagtigum ug masuta ang uban pang panginahanglanon aron sa mas malungtarong proyekto.

Ang maong pagbansay gipatigayon sa Provincial Administrator's Office - Employment and Workforce Development Division sa pakipag-alayon sa LGU-Talaingod.

DavNor News