Mipasidaan si Kuya Gov. Edwin I. Jubahib nga bawal pa gihapon ang pagdula sa basketball sa mga purok ug barangay, sa pagpadayon sa Modified General Community Quarantine (MGCQ) sa probinsya sa Davao del Norte.

Kini human gitaho nga dunay mga batan-on nga nagdula-dula og basketball sa mga purok sa pagtoo nga gitugtan na kini.

Sulti ni Kuya Gob nga wala pa gitugtan ang pagpahigayon sa maong sports, labi na kay padayon nga nagataas ang kaso sa nagapositibo sa COVID-19 sa lalawigan.

“Gibawal pa nato ang ubang panagtapok ug mga padula aron malikayan ang local transmission, labi na nga expected nga mosaka ang mga kaso sa COVID-19 tungud sa pag-uli sa atong mga OFWs ug LSIs,” ingon sa gobernador.

Iyang gimandoan ang mga awtoridad ug mga barangay officials sa pagbadlong ug pagdakop sa mga molapas niini.

Giklaro ni Provincial Sports and Youth Development Officer (PSYDO) Giovanni Gulanes nga sa pagkakaron ang gitugtan pa lang nga makadula mao ang mga professional players, sama sa Philippine Basketball Association (PBA), base sa Joint Admininstrative Order (JAO) na gipagula sa Department of Health (DOH), Games and Amusement Board (GAB), ug Philippine Sports Commission (PSC).

Pero, ilang gipatuman ang “bubble” concept, diin ang mga players, coaches ug staffers sa nagkadaiyang team magpuyo jud ug dili makagawas sa venue, samtang misubay sa safety and health protocols.

Pwede lang mapahigayon ang dula sa PBA sa mga lugar nga MGCQ na, pero walay makatan-aw nga live audience kay ipakita lang kini sa TV ug online.

Kinahanglan pud mapa-swab test ang tanang partisipante bag-o sila makasulod sa Bubble Training ug Bubble Competition.

“Halimbawa training sila for two months then after two months magpa-liga ug six months for one season. So, dili sila makagawas for eight months. Pag swab test nila, dapat negative. So, during practice or dula pwede na sila waly mask kay hundred percent man na bantayan sila’g military or police tapos hatagan ug pagkaon,” ingon ni Dulanes.

Dugang pa niya nga bisan pa ang mga dagko na kompetisyon sama sa University Athletics Association of the Philippines (UAAP), National Collegiate Athletic Association (NCAA), ug Maharlika Pilipinas Basketball League (MBPL) wala pa gitugotan magpahigayon ug liga.

“Pati gani ang MBPL dili pa tugotan kay semi-PRO man gud. So, if tugotan na sila, they would again have a similar Bubble training and competition somewhere. Layo pa kaayo ang pa-liga sa barangay, DAVRAA, PRISAA. So far isa pa lang ang naay go signal,” pagpaklaro ni Gulanes. (Noel Baguio, with reports from Danica Villanueva)

 

DavNor News